અમદાવાદમાં વહેલી સવારથી વરસાદ, છેલ્લા 24 કલાકમાં રાજ્યના 137 તાલુકાઓમાં મેઘમહેર

વલસાડ જિલ્લાના કપરાડા તુલાકમાં 3.9 ઇંચ, બનાસકાંઠા જિલ્લાના અમીરગઢ તાલુકામાં 3.15 ઇંચ, ડીસા તાલુકામાં 2.83 ઇંચ, વાવ-થરાદ જિલ્લાના રાહ તાલુકામાં 2.4 ઇંચ, લાખણીમાં 1.77 ઇંચ, મહેસાણામાં 1.77 ઇંચ, સુરત જિલ્લાના ઉમરપરા તાલુકામાં 1.73 ઇંચ, વલસાડ જિલ્લાના નાનાપોંઢા તાલુકામાં 1.73 ઇંચ, બનાસકાંઠા જિલ્લાના વડગામ તાલુકામાં1.46 ઇંચ અને મોરબી જિલ્લાના હળવદ તાલુકામાં 1.38 ઇંચ વરસાદ ખાબક્યો હતો. 

અમદાવાદના  સાયન્સ સિટી અને થલતેજ વિસ્તારમાં એક કલાકમાં 2 ઇંચ સુધી વરસાદ પડ્યો હતો. જ્યારે  વસ્ત્રાપુર, બોડકદેવ, મેમનગર, ઘાટલોડિયા, અને ચાંદલોડિયામાં 1 ઇંચ સુધી વરસાદ નોંધાયો હતો. જ્યારે  બોપલ, ઘુમા, સરખેજ, જોધપુર, સેટેલાઈટ, વાસણા, નવરંગપુરા, ન્યુ રાણીપ, આશ્રમરોડ, રાણીપ, દુધેશ્વર, મેમકો, શાહપુર, અસારવા અને હંસપુરામાં અડધો ઇંચ વરસાદ પડ્યો હતો.

ભારે વરસાદને કારણે એસ.જી. હાઇવે પરના સર્વિસ રોડ પર પાણી ભરાઈ ગયા છે. ખાસ કરીને થલતેજ સર્વિસ રોડ પર કારના અડધાથી વધુ ટાયર ડૂબી જાય તેટલા પાણી ભરાઈ જતાં વાહનચાલકો ભારે પરેશાની ભોગવી રહ્યા છે. આ ઉપરાંત, આજે સોમવારનો દિવસ હોવાથી સવારના સમયે શાળાએ જતા વિદ્યાર્થીઓ માટે પણ વરસાદ વિઘ્નરૂપ બન્યો હતો.

હાલ દક્ષિણ ગુજરાત અને ઉત્તર ગુજરાતના વિવિધ ભાગોમાં બરાબરનો વરસાદી માહોલ જામ્યો છે, જ્યારે સૌરાષ્ટ્રમાં વરસાદનું જોર થોડું ઓછું જોવા મળી રહ્યું છે.  હવામાન વિભાગ દ્વારા આજે વાવ-થરાદ, પાટણ, વડોદરા સહિત 11 જિલ્લાઓ અને 2 કેન્દ્રશાસિત પ્રદેશોમાં ભારે વરસાદની વિધિવત આગાહી સાથે ‘યલો એલર્ટ’ જાહેર કરવામાં આવ્યું છે.