ગુજરાત ATS નો બીજો મોટો ખુલાસો: જૈશના આતંકીઓ કાચની બરણીમાં મોતનો ગેસ બનાવતા હતા

અમદાવાદ: ગુજરાત એન્ટી ટેરરિસ્ટ સ્ક્વોડ દ્વારા બનાસકાંઠાના પાલનપુર અને પાટણના સિદ્ધપુર વિસ્તારમાંથી પકડાયેલા જૈશ-એ-મોહમ્મદના 13 આતંકવાદીઓની તપાસમાં અત્યંત ગંભીર અને ચોંકાવનારી બાબતો પ્રકાશમાં આવી છે. આ આતંકીઓ ગુજરાતમાં કોઈ મોટી આત્મઘાતી ઘટનાને અંજામ આપવાની ફિરાકમાં હતા. આ માટે તેઓએ સિદ્ધપુર નજીક 8 વખત બોમ્બ બ્લાસ્ટનું ટેસ્ટિંગ પણ કર્યું હોવાનું સામે આવ્યું છે. એટલું જ નહીં, આતંકીઓએ જુદા-જુદા પુસ્તકોના આધારે જીવલેણ અને ઝેરી વાયુ બનાવવા માટે એક નવી પદ્ધતિ વિકસાવવાનો પણ પ્રયાસ કર્યો હતો.

પૂછપરછ દરમિયાન જાણવા મળ્યું કે, ઝડપાયેલા 13 આતંકવાદીઓ પૈકી 5 આતંકીઓ પાકિસ્તાનમાં બેઠેલા હેન્ડલર્સ અને સંગઠનના આકાઓ સાથે સીધા સંપર્કમાં હતા. તેમની પાસેથી જૈશના મુખિયા મૌલાના અઝહર મસૂદને લખેલા પત્રો પણ મળી આવ્યા છે. આ આતંકીઓએ પાકિસ્તાની આકાઓની સામગ્રીના આધારે ઝેરી ગેસ બનાવવાની તાલીમ મેળવી હતી. તેઓ કાચની એક હવાચુસ્ત બરણીમાં છાણ, મકાઈનો લોટ, મટનના ટુકડા અને ઘાતક કેમિકલ્સ મિક્સ કરી તેને 15 દિવસ સુધી જમીનની નીચે દાટી રાખતા હતા, જેથી અંદર જીવલેણ ગેસ તૈયાર થતો હતો. આ કેમિકલ વેપનનો ઉપયોગ તેઓ કયા ચોક્કસ ટાર્ગેટ પર કરવાના હતા તે દિશામાં હાલ ATS તપાસ ચલાવી રહી છે.

આતંકવાદી સંગઠન દ્વારા મોકલવામાં આવેલી સામગ્રીના આધારે 43 પુસ્તિકાઓ તૈયાર કરવામાં આવી હતી, જેનું જુદી-જુદી મદરેસાઓમાં ગુપ્ત રીતે વિતરણ કરવામાં આવતું હતું. આ આતંકીઓ મદરેસાઓમાં ભણતા માસૂમોને ટાર્ગેટ કરતા હતા. જે યુવાનોમાં આતંકી માનસિકતા દેખાય, તેમને ખાસ દાવતના બહાને બોલાવી દેશવિરોધી પ્રવૃત્તિઓ માટે તેમનું બ્રેઇનવોશ કરવામાં આવતું હતું.

ધરપકડ કરાયેલા આતંકીઓ પૈકી કેટલાક શાતિર તત્વો જમ્મુ-કાશ્મીર જઈને ઘાતક હથિયારો ચલાવવાની સઘન તાલીમ લઈને પરત ફર્યા હતા. તેમણે આગામી સમયમાં ગુજરાતમાં સિરિયલ બ્લાસ્ટ કરવાના હેતુથી વડોદરા અને ભરૂચ સહિતના વિસ્તારોમાં ગુપ્ત બેઠકો યોજી હતી. આ આખા નેટવર્કનો મુખ્ય આકા અમદાવાદ આસપાસના વિસ્તારોમાં મોટો ગાર્ડન ધરાવતી હોટલોમાં રોકાઈને આખું નેટવર્ક ઓપરેટ કરતો હતો, જેને પકડવા માટે ATS દ્વારા હાલ ચક્રો ગતિમાન કરવામાં આવ્યા છે.