અમદાવાદ એરપોર્ટ પર બેંગકોકના મુસાફર પાસેથી 8.9 કિલો હાઇડ્રોપોનિક ગાંજો ઝડપાયો

ગુપ્ત માહિતીના આધારે કાર્યવાહી કરતા, કસ્ટમ્સની ટીમે મુસાફરને અટકાવ્યો હતો અને તેના ચેક-ઇન સામાનની ઝીણવટપૂર્વક તપાસ કરી હતી. તપાસ દરમિયાન ટ્રોલી બેગમાં છુપાવવામાં આવેલો આ નશીલો પદાર્થ મળી આવ્યો હતો.

અધિકારીઓના જણાવ્યાં અનુસાર,એરપોર્ટ સુરક્ષા તપાસ દરમિયાન પકડાઈ ન જવાય તે હેતુથી ગાંજો ખાસ તૈયાર કરાયેલા 14 એરટાઈટ પેકેટોમાં પેક કરીને બેગમાં કપડાં વચ્ચે છુપાવવામાં આવ્યો હતો.

કસ્ટમ્સ વિભાગે નાર્કોટિક ડ્રગ્સ એન્ડ સાયકોટ્રોપિક સબસ્ટન્સિસ એક્ટની જોગવાઈઓ હેઠળ આ પ્રતિબંધિત પદાર્થ જપ્ત કર્યો હતો. દાણચોરીના આ પ્રયાસ બદલ મુસાફરની ધરપકડ કરવામાં આવી હતી.

બેંગકોકમાં આ ગાંજાના સ્ત્રોત અને અમદાવાદમાં આ કન્સાઇનમેન્ટ કોને પહોંચાડવાનું હતું તેની ઓળખ કરવા માટે અધિકારીઓએ વિગતવાર તપાસ શરૂ કરી છે.