ગુજરાત મહિલા કોંગ્રેસ પ્રમુખ ગીતા પટેલના પુત્રની નકલી પાસપોર્ટ કેસમાં ATS એ કરી ધરપકડ

ATS એ અમદાવાદના શાહીબાગ વિસ્તારમાં આવેલા ઊર્મિ બંગલોઝ ખાતે રહેતા હરિકેશ પ્રણવ પટેલની સાયન્સ સિટી પાસેથી ધરપકડ કરી હતી. પૂછપરછમાં ઘટસ્ફોટ થયો હતો કે આરોપી વર્ષ 2023 ના EDના મની લોન્ડ્રિંગ કેસમાં સંડોવાયેલો હતો અને તેના જામીન રદ થતાં તેનો અસલ પાસપોર્ટ કોર્ટમાં જમા હતો.

વિદેશ પ્રવાસ કરવાના ઈરાદે આરોપીએ દુબઈના એક મિત્ર મારફતે દિલ્હીના એજન્ટનો સંપર્ક સાધ્યો હતો. રૂ. 25 લાખ આપીને આરોપીએ આગ્રા ખાતે ભાડે રહેતો હોવાનો બનાવટી રેન્ટ એગ્રીમેન્ટ તૈયાર કરાવ્યો હતો. ત્યાર બાદ દિલ્હી ક્રાઈમ બ્રાન્ચમાં પાસપોર્ટ ખોવાઈ ગયો હોવાની ખોટી અરજી કરી હતી, ગાઝિયાબાદ પાસપોર્ટ ઓફિસમાંથી વર્ષ 2024 માં નવો પાસપોર્ટ મેળવી લીધો હતો. આ નકલી પાસપોર્ટને આધારે તે ભૂતાન અને નેપાળ મારફતે બેંગકોક, દુબઈ અને સિંગાપોર જેવા દેશોમાં પ્રવાસ કરી ચૂક્યો છે.

તપાસમાં સામે આવ્યું છે કે આરોપી અગાઉ નારણપુરા અને ક્રાઈમ બ્રાન્ચના છેતરપિંડીના ગુનાઓમાં સંડોવાયેલો હતો. તેના નામે અનેક બોગસ કંપનીઓ રજિસ્ટર્ડ હોવાનું તેમજ છેતરપિંડીના નાણાં ટ્રાન્સફર કરવા માટે 'મ્યુલ એકાઉન્ટ્સ' ઉપયોગમાં લેવાતા હોવાનું ખૂલ્યું છે. આરોપી વધુ એક નાણાકીય કૌભાંડ આચરે તે પહેલાં જ ATSએ તેને પકડી પાડ્યો હતો.