પ્રધાનમંત્રી આવાસ યોજનામાં મકાન અપાવવાના નામે રૂ. 4.07 લાખની લાંચ લેતો શખ્સ ACB ના છટકામાં ઝડપાયો

ફરિયાદીએ પ્રધાનમંત્રી આવાસ યોજના હેઠળ મકાન મેળવવા માટે અગાઉ ફોર્મ ભર્યું હતું, પરંતુ તેમને મકાન મળ્યું ન હતું. આ દરમિયાન તેઓ આરોપી સુરેશકુમાર પંડ્યાના સંપર્કમાં આવ્યાં હતા. આરોપીએ યોજનામાં સેટિંગ કરીને મકાન ફાળવી આપવાનો ભરોસો આપ્યો હતો અને ફરિયાદી પાસેથી અગાઉ રૂ. 3,82,500 પડાવી લીધા હતા.

ત્યાર બાદ આરોપીએ અન્ય એક સાહેદને પણ આ જ રીતે મકાન અપાવવાની લાલચ આપી રૂ. 5,75,000 ની લાંચ માંગી હતી. રકઝકના અંતે રૂ. 4,07,500 આપવાનું નક્કી થયું હતું.

લાંચની આ રકમ ચૂકવવા ન માંગતા હોવાથી ફરિયાદી અને સાહેદે એ.સી.બી.નો સંપર્ક કર્યો હતો. ફરિયાદીની ફરિયાદના આધારે એ.સી.બી.એ ગોઠવેલા છટકામાં આરોપી સુરેશકુમાર પંડ્યા શાહીબાગ સ્વામિનારાયણ મંદિર પાસે લાંચની રકમ રૂ. 4,07,500 સ્વીકારતાં જ સ્થળ પર ઝડપાઈ ગયો હતો. એ.સી.બી.એ પૂરેપૂરી રકમ રિકવર કરી કાયદેસરની કાર્યવાહી હાથ ધરી છે.