અમદાવાદઃ વિમાનના ટોયલેટ સ્પીકરમાંથી રૂ. 4 કરોડોનું સોનું જપ્ત, બે પાઉચમાંથી 24 સોનાના બિસ્કિટ મળ્યાં

અધિકારીઓએ વિમાનનું નિરીક્ષણ કર્યું. શોધ દરમિયાન, શૌચાલયમાં સ્પીકર બોક્સની અંદર બે પેકેટ મળી આવ્યાં હતા. આ પેકેટોમાં 24 સોનાના બિસ્કિટ હતા.આ સોનાના બિસ્કિટની બજાર કિંમત 4 કરોડ રૂપિયાથી વધુ આંકવામાં આવી છે.

કાળા ટેપથી લપેટાયેલા બે પાઉચમાં સોનું મળી આવ્યું

એરપોર્ટ પરથી મળેલી માહિતી અનુસાર, અધિકારીઓને વિમાન દ્વારા સોનાની દાણચોરી અંગે માહિતી મળી હતી. ગુરુવારે અમદાવાદ એરપોર્ટ પર ઇન્ડિગોની ફ્લાઇટ 6E-1478 આવતાની સાથે જ તપાસ શરૂ કરવામાં આવી હતી. ભૂતકાળમાં પણ વિમાનના શૌચાલયોમાં સોનાની દાણચોરીના બનાવો નોંધાયા છે.

એક ટીમે શૌચાલયનું સંપૂર્ણ નિરીક્ષણ કર્યું. જ્યારે શૌચાલયનું સ્પીકર બોક્સ દૂર કરવામાં આવ્યું, ત્યારે તે અસામાન્ય રીતે ભારે લાગ્યું. બોક્સ ખોલતાંની સાથે કાળા ટેપમાં લપેટાયેલા બે પાઉચ મળી આવ્યાં હતા. પાઉચમાં 999.0 (24-કેરેટ) શુદ્ધતાવાળા 24 વિદેશી મૂળના સોનાના બિસ્કિટ હતા. તેમનું કુલ વજન 2,799.3 ગ્રામ હતું.