અમદાવાદઃ મોબાઈલ ગેમની લત, 14 વર્ષનો કિશોર સ્કૂલે જવાનું કહીને આખો મહિનો બગીચામાં જઇને ગેમ રમતો હતો

અમદાવાદઃ શહેરમાં એક ચોંકાવનારો કિસ્સો સામે આવ્યો છે. 14 વર્ષના કિશોરને ઓનલાઈન મોબાઈલ ગેમ્સની એટલી ગંભીર લત લાગી ગઈ હતી કે તેણે લગભગ એક મહિના સુધી સ્કૂલે જવાનું બંધ કરી દીધું હતું. માતા-પિતા એમ જ સમજતા હતા કે દીકરો ક્લાસમાં છે, પરંતુ તે જાહેર સ્થળોએ બેસીને આખો દિવસ મોબાઈલ પર ગેમ રમતો હતો.

પૂર્વ અમદાવાદમાં રહેતી તે કિશોરની માતાએ મદદ માટે અભયમ 182 મહિલા હેલ્પલાઈનનો સંપર્ક કર્યો ત્યારે આ કિસ્સો સામે આવ્યો હતો. કાઉન્સિલરોએ જણાવ્યું કે આ કિશોરે તેના માતા-પિતાના બેંક કાર્ડનો ઉપયોગ કરીને ઓનલાઈન ખરીદી પણ કરી હતી.

કાઉન્સિલરોના જણાવ્યાં અનુસાર, કોવિડ-19 મહામારી દરમિયાન ઓનલાઈન અભ્યાસ સરળ બને તે માટે માતા-પિતાએ તેમની 14 વર્ષની જોડીયા સંતાનો માટે સ્માર્ટફોન ખરીદ્યા હતા. દીકરીનો ફોનનો ઉપયોગ મર્યાદિત રહ્યો હતો, પરંતુ દીકરો ધીમે-ધીમે ગેમિંગની ગંભીર લતનો શિકાર બની ગયો.

તે કિશોર વારંવાર તેના માતા-પિતાને કહેતો હતો કે તે અભ્યાસ અને સ્કૂલના અસાઇનમેન્ટ માટે ફોનનો ઉપયોગ કરી રહ્યો છે. જો કે, કાઉન્સિલરોને જાણવા મળ્યું કે તે તેના દિવસનો મોટાભાગનો સમય મલ્ટિપ્લેયર ઓનલાઈન રોલ-પ્લેઈંગ ગેમ્સ રમવામાં વિતાવતો હતો.

આશરે બે મહિના પહેલા, આ લતની અસર તેની દિનચર્યા પર પડવા લાગી હતી. જ્યારે પણ તેના માતા-પિતા તેની પાસેથી ફોન છીનવી લેવાનો પ્રયાસ કરતા, ત્યારે તે કથિત રીતે હિંસક અને આક્રમક બની જતો, મોટે મોટેથી બૂમો પાડતો અને જ્યાં સુધી તેને ફોન પાછો ન મળે ત્યાં સુધી સોસાયટીમાં તમાશો કરતો હતો.

માતા-પિતાને આ સમસ્યાની ગંભીરતાની ખબર ત્યારે પડી જ્યારે સ્કૂલના સત્તાધીશોએ તેમને જાણ કરી કે નવું શૈક્ષણિક સત્ર શરૂ થયા પછી છોકરો લગભગ એક મહિનાથી ગેરહાજર છે. સ્કૂલે જવાને બદલે, તે આખો દિવસ કોઈ જાહેર સ્થળે કે બગીચામાં ગેમ રમવામાં વિતાવતો અને તેના નિયમિત સમયે ઘરે પાછો ફરી જતો હતો. અભયમના કાઉન્સિલિંગ પછી, કિશોર તેનો ફોન માતા-પિતાને સોંપવા અને ફરીથી સ્કૂલે જવા માટે સંમત થયો હતો.