ઘરકંકાસનો કરુણ અંજામ: નિકોલમાં પત્ની પર છરીના ઘા ઝીંકીને ફરાર થયેલા પતિએ ટ્રેન નીચે ઝંપલાવ્યું

અમરેલીમાં સાસરી ધરાવતા રેખાબેનને પતિ ભાવેશ બારૈયા સાથે અણબનાવ ચાલતો હતો. આથી 10 દિવસ પૂર્વે તે અમદાવાદના નિકોલ વિસ્તારમાં રહેતી પોતાની નાની બહેનના ઘરે આવી ગઈ હતી. શનિવારે બપોરે ભાવેશ પત્નીને મનાવીને પરત લઈ જવા અમદાવાદ પહોંચ્યો હતો. સાળીના ઘરની અગાશી પર બંને વચ્ચે વાતચીત ચાલી રહી હતી ત્યારે મામલો બિચક્યો હતો અને ઉગ્ર બોલાચાલી થઈ હતી.

આ દરમિયાન આવેશમાં આવી ગયેલા ભાવેશે પોતાની પાસે રહેલી છરી વડે પત્ની પર તૂટી પડ્યો હતો. લોહીલુહાણ હાલતમાં રેખાબેને બૂમાબૂમ કરતાં ભાવેશ ત્યાંથી નાસી છૂટ્યો હતો. હુમલો કર્યા બાદ ભાવેશ ટ્રેન મારફતે અમરેલી જવા રવાના થયો હતો. જો કે, રસ્તામાં તેણે બોટાદના ઢસા નજીક ચાલુ ટ્રેન નીચે પડતું મૂકી આત્મહત્યા કરી લીધી હતી.

ગંભીર રીતે ઈજાગ્રસ્ત રેખાબેનને તાત્કાલિક સારવાર અર્થે હોસ્પિટલ ખસેડવામાં આવ્યાં હતા, જ્યાં તેમની સ્થિતિ નાજુક હોવાનું જાણવા મળ્યું છે. આ દંપતીને ત્રણ સંતાનો હોવાથી પિતાના મોત અને માતાની ગંભીર હાલત વચ્ચે નિર્દોષ બાળકો પર આભ તૂટી પડ્યું છે. આ બનાવ અંગે પોલીસે ગુનો નોંધી આગળની કાયદેસરની કાર્યવાહી હાથ ધરી છે.