મોજશોખ માટે અમદાવાદના પેલેડિયમ મોલમાંથી લાખો રૂપિયાના દાગીના ચોરનાર કર્મચારી પકડાયો

પોલીસ ફરિયાદ અનુસાર, પેલેડિયમ મોલમાં આવેલા 'ઓરા ફાઇન જ્વેલરી' શોરૂમમાં સેલ્સ એક્ઝિક્યુટિવ તરીકે ફરજ બજાવતા દર્શન અશ્વિન સોનીએ 17 ઓગસ્ટના રોજ ચોરીની યોજના પાર પાડી હતી. તેણે શોરૂમ બંધ થયા બાદ સાથી કર્મચારીને 'હું અંદર બેગ ભૂલી ગયો છું' તેવું બહાનું બતાવીને શોરૂમની ચાવી મેળવી લીધી હતી. ત્યાર બાદ રાત્રિના સમયે શોરૂમ ખોલી તિજોરીમાંથી રૂ. 5,90,242ની કિંમતના સોનાના દાગીના અને ડાયમંડ ચોરી લીધા હતા. સમગ્ર ઘટના સીસીટીવી કેમેરામાં કેદ થઇ હતી, શોરૂમ સંચાલકોએ વસ્ત્રાપુર પોલીસ મથકે પુરાવા સાથે ફરિયાદ નોંધાવી હતી.

ચોરી કર્યા બાદ આરોપી નોકરી પર ગેરહાજર રહ્યો હતો અને ઘર છોડીને નાસતો ફરતો હતો. ટેકનિકલ સર્વેલન્સ અને બાતમીને આધારે વસ્ત્રાપુર પોલીસે તેને દબોચી લીધો હતો. પ્રાથમિક પૂછપરછમાં આરોપીએ કબૂલાત કરી હતી કે, મોજશોખ અને નાણાંની જરૂરિયાત પૂરી કરવા તેણે આ ચોરી કરી હતી. ચોરી કરેલા ઘરેણાં તેણે માણેકચોકના ‘ભક્તિટચ’ નામના સોનીને વેચી દીધા હતા અને મળેલા નાણાંથી અલગ-અલગ સ્થળોએ ફરી મોજશોખ કર્યા હતા. પોલીસે હાલ સોની પાસેથી મુદ્દામાલ રિકવર કરવાની તજવીજ હાથ ધરી છે.

પોલીસ તપાસમાં બહાર આવ્યું છે કે, મૂળ પાટણનો અને અમદાવાદના વ્યાસવાડી વિસ્તારમાં રહેતો દર્શન સોની ધોરણ 12 પાસ છે અને છેલ્લા 10 મહિનાથી આ શોરૂમમાં નોકરી કરતો હતો. તેનો ગુનાહિત ઇતિહાસ તપાસતાં પોલીસ પણ ચોંકી ઉઠી હતી. આરોપી સામે વર્ષ 2016 થી લઈને અત્યાર સુધીમાં પાટણ, ડીસા, ચાંદખેડા, વાડજ, સોલા, નવસારી અને ગાંધીનગર સહિતના પોલીસ મથકોમાં પ્રોહિબિશન, ઘરફોડ ચોરી, વાહન ચોરી, ચેઈન સ્નેચિંગ, અકસ્માત અને પાસા સહિત કુલ 13 ગુનાઓ નોંધાઈ ચૂક્યાં છે.