સાબરમતી નદી બની મિસ્ટ્રી સ્પોટ: કંકાલ મળ્યાંના 24 કલાકમાં વધુ એક યુવકની ભેદી લાશ મળી

પ્રાપ્ત વિગતો મુજબ, આજે સવારે અંદાજે 10 વાગ્યાની આસપાસ સાબરમતી નદીમાં એક યુવકની લાશ તરતી હોવાની માહિતી મળતાં જ ફાયર બ્રિગેડની રિવર રેસ્ક્યૂ ટીમ અને રિવરફ્રન્ટ ઇસ્ટ પોલીસનો કાફલો ઘટના સ્થળે દોડી ગયો હતો. ફાયર ટીમે તાત્કાલિક મૃતદેહને બહાર કાઢ્યો હતો. તેના હાથ પર હિન્દીમાં લખેલું હતું: 'મેરે પાપા કો મેરી બોડી પહોંચા દેના' અને સાથે એક મોબાઈલ નંબર પણ લખ્યો હતો.

પોલીસે આ નંબર પર સંપર્ક કરતાં મૃતકની ઓળખ રોહિત પ્રજાપતિ (રહે. ડુંગરપુર, રાજસ્થાન) તરીકે થઈ હતી. પોલીસે તાત્કાલિક પરિવારજનોને જાણ કરી મૃતદેહને પોસ્ટમોર્ટમ માટે મોકલી આપ્યો હતો, યુવકે આત્મહત્યા કરી છે કે તેની પાછળ અન્ય કોઈ કારણ જવાબદાર છે, તે દિશામાં પોલીસે ઊંડાણપૂર્વક તપાસ હાથ ધરી હતી.

ઉલ્લેખનીય છે કે, ગઈકાલે બપોરે પણ જમાલપુર બ્રિજ નજીક સાબરમતી નદીમાંથી એક અજાણ્યું માનવ કંકાલ મળી આવ્યું હતું. આ હાડપિંજર પર માત્ર ઉપરના ભાગે સામાન્ય કપડાં બચેલા હતા. પોલીસના પ્રાથમિક અનુમાન મુજબ, આ મૃતદેહ 10 દિવસ કરતાં પણ વધુ જૂનો હોઈ શકે છે. સતત બે દિવસમાં એક અજાણ્યું હાડપિંજર અને ત્યારબાદ યુવકની ભેદી લાશ મળી આવતાં સમગ્ર મામલો અત્યંત રહસ્યમય બન્યો છે. પોલીસે બંને કેસમાં આગળની કાયદેસરની કાર્યવાહી તેજ કરી છે.