ATS તપાસમાં મોટો ખુલાસો: ઝડપાયેલો આતંકી બિલાલ કઠવાડાની હોટલમાં એક વર્ષથી રહેતો હતો

કઠવાડામાં આવેલી હોટલ દિવ્યાના સીસીટીવી ફૂટેજ પોલીસના હાથે લાગ્યા છે, જેમાં બિલાલ શેરા તેના એક મિત્ર સાથે હોટલમાંથી બહાર નીકળતો સ્પષ્ટ જોવા મળી રહ્યો છે. એટીએસની તપાસ મુજબ, બિલાલ પોતાની ઓળખ છુપાવવા માટે દિવસભર બહાર રહેતો અને માત્ર રાત્રે સૂવા માટે જ આ હોટલ પર આવતો હતો. પકડાઈ જવાના ડરથી તે હોટલના ભાડા અને અન્ય ખર્ચનું પેમેન્ટ ઓનલાઈન કરવાને બદલે હંમેશાં રોકડા રૂપિયા આપીને જ કરતો હતો.

ATS ના DIG સુનિલ જોશીએ વિગતો આપતા જણાવ્યું કે, આ આતંકીઓ પ્રો-જેહાદી વિચારધારા ધરાવે છે અને જૈશ-એ-મોહમ્મદ સાથે જોડાયેલા છે. આતંકીઓના મોબાઈલમાંથી બોમ્બ બનાવવાની રીત દર્શાવતી પીડીએફ (PDF) અને જેહાદી સાહિત્ય મળી આવ્યું છે.

આતંકીઓ ઓનલાઈન તેમજ સ્થાનિક બજારમાંથી પોટેશિયમ નાઇટ્રેટ અને સલ્ફર ખરીદીને ગન પાઉડર બનાવતા હતા. તેમણે ટાઈમર ડિવાઈઝ પણ ખરીદ્યું હતુ, આ આતંકીઓ છેલ્લા 3 વર્ષથી લિટરેચરનો અભ્યાસ કરી રહ્યાં હતા અને લોકોની નજરમાં આવ્યાં વિના અવાવરુ જગ્યાઓએ કુલ 8 વખત બોમ્બ બ્લાસ્ટનું પરીક્ષણ (ટેસ્ટિંગ) પણ કરી ચૂક્યાં છે.

આતંકીઓના મોબાઈલમાંથી અકેલા જેહાદ કૈસે કરે જેવી પુસ્તકોની પ્રિન્ટ અને જૈશના આકા મસૂદ અઝહરના જેહાદી ભાષણોવાળી પેન ડ્રાઈવ પણ મળી આવી છે. તપાસમાં સામે આવ્યું છે કે, ઝડપાયેલા આરોપી મોહમ્મદ અયુબ કડીવાલાએ અન્ય સાથીદારો મોહમ્મદ અમીન શેરા અને મોહમ્મદ ગાંજીવાલા સાથે મળીને મસ્જિદોમાં ગુપ્ત બેઠકો (દાવત) યોજી હતી, જ્યાં તેઓ આઈઈડી (IED) એસેમ્બલ કરતા અને બ્લાસ્ટ કરતા શીખ્યા હતા. આ આતંકીઓ મદ્રેસાના અન્ય તાલીમાર્થીઓને પણ જેહાદના રસ્તે વાળવા માટે આવી ત્રણ જેટલી ગુપ્ત દાવતો આપી ચૂક્યા છે. 

હાલ એટીએસ એ દિશામાં તપાસ કરી રહી છે કે આ આતંકીઓનો આગામી ટાર્ગેટ શું હતો તે દિશામાં તપાસ શરૂ કરી છે.