અમદાવાદમાં નકલી બ્લડ પ્લાઝ્મા રેકેટનો પર્દાફાશ, 4 લોકોની ધરપકડ

આ રેકેટની મોડસ ઓપરેન્ડીનો ખુલાસો કરતા અમદાવાદ ગ્રામ્ય પોલીસે જણાવ્યું કે ગેંગના ચાર સભ્યો - મુખ્ય આરોપી દિનેશ ચૌધરી, લેબ માલિક મોહન ગાયકવાડ, સપ્લાયર-ડ્રાઈવર રફીક અને જીતેન્દ્ર સોલંકીની ધરપકડ કરવામાં આવી છે. તેઓ ચાંગોદરમાં એક લેબ ચલાવતા હતા. જ્યાં તેઓ રક્ત એકમોમાંથી અસલી પ્લાઝ્મા કાઢતા હતા, તેને મીઠાના ખારા પાણીથી બદલી નાખતા હતા અને ભેળસેળયુક્ત ઉત્પાદન અડધા ભાવે વેચતા હતા.

જ્યારે પણ કોઈ દર્દી માટે લેબ કે બ્લડ બેંકમાંથી પ્લાઝ્મા મોકલવામાં આવતું હતુ, ત્યારે આરોપી તે ટ્રાન્ઝિટ દરમિયાન સંબંધિત વ્યક્તિને છેતરતો હતો. તેઓ અસલી પ્લાઝ્મા મેળવતા અને તેને ખારા પાણીથી બનેલા નકલી પ્લાઝ્માથી બદલી નાખતા હતા. 

અડધી કિંમતે પ્લાઝમાનું વેચાણ

પોલીસ તપાસમાં બહાર આવ્યું છે કે આરોપીઓ છ મહિનાથી બેફામપણે આ જોખમી નકલી પ્લાઝમાનું રેકેટ ચલાવી રહ્યાં હતા. અસલી પ્લાઝ્માની બજાર કિંમત સામાન્ય રીતે પ્રતિ યુનિટ રૂ. 2,000 થી રૂ. 5,000 સુધીની હોય છે. આરોપીઓ આ અસલી પ્લાઝ્માની ચોરી કરતા હતા, તેને ખારા દ્રાવણથી બદલી નાખતા હતા અને નકલી ઉત્પાદનને રૂ 1,000 થી રૂ. 3,000 ની વચ્ચે ગેરકાયદેસર રીતે વેચીને મોટો નફો કમાતા હતા.

બ્લડ બેંક અને ડિલિવરી નેટવર્ક સાથે લિંક્સ

આ રેકેટનું નેટવર્ક બ્લડ બેંકની ડિલિવરી ચેઇન સાથે સીધું જોડાયેલું હતું. મુખ્ય આરોપી, દિનેશ ચૌધરી, બ્લડ બેંકમાંથી અસલી પ્લાઝ્મા પરિવહન કરતો ડ્રાઇવર, રફીક અને તેના સાથી, જીતેન્દ્ર સોલંકી સાથે સતત સંપર્કમાં હતા. દિનેશ તેની જરૂરિયાતોના આધારે વિવિધ રક્ત જૂથોના અસલી પ્લાઝ્મા મેળવતો હતો. ત્યાર બાદ, પ્લાઝ્માને ચાંગોદરની એક પ્રયોગશાળામાં લઈ જવામાં આવતું હતુ, જ્યાં અસલી પ્લાઝ્માની જગ્યાએ નકલી મુકી દેવાતું હતુ.

ધરપકડ કરાયેલા ચાર આરોપીઓમાં, ચાંગોદર સ્થિત લેબોરેટરીના માલિક મોહન ગાયકવાડ પાસે લેબોરેટરી ટેકનોલોજીમાં ડિપ્લોમા છે. તે પહેલાથી જ બ્લડ બેંક કામગીરી સાથે સંકળાયેલો હતો અને આ જઘન્ય ગુનાને અંજામ આપવા માટે તેણે આ ટેકનિકલ કુશળતાનો ઉપયોગ કર્યો હતો.

મુખ્ય આરોપી, દિનેશ ચૌધરી પાસે કોઈ તબીબી બેંકગ્રાઉન્ડ નથી, તેની પાસે બી.કોમની ડિગ્રી છે અને તે બ્લડ બેંકો સાથે સંપર્ક સંભાળતા સેલ્સ એક્ઝિક્યુટિવ તરીકે કામ કરતો હતો, જ્યારે અન્ય બે આરોપીઓ ડિલિવરીનું સંચાલન કરતા હતા.

પોલીસે આરોપીઓ પાસેથી રૂ. 11,00,000 ની કિંમતના 1150 બ્લડ પ્લાઝમા યુનિટ, એક ડીપ ફ્રીઝર, કેમિકલ બોટલ્સ, સીલિંગ મશીન, 34 ખાલી પ્લાઝમા બેગ અને ટ્રાન્સપોર્ટેશન માટે વપરાતું એક વાહન સહિત કુલ રૂપિયા 15 લાખનો મુદ્દામાલ જપ્ત કર્યો છે.