ગુજરાતમાં મેઘમહેર: પાટણમાં ધોધમાર વરસાદ, પાલનપુરમાં પાણી ભરાયા

પાલનપુર-અંબાજી હાઇવે અને પાલનપુરના જૂના બસ સ્ટેન્ડ વિસ્તારમાં ઘૂંટણસમા પાણી ભરાતાં વાહનચાલકો મુશ્કેલીમાં મુકાયા હતા. પાટણમાં ધમાકેદાર વરસાદથી રેલવે ગરનાળા, ગાયત્રી મંદિર, ચિત્રકુટનગર, યોગેશ્વર પાર્ક અને શ્રીનગર સોસાયટી જેવા વિસ્તારોમાં પાણી ભરાઈ ગયા છે. મહીસાગર, પંચમહાલ અને દાહોદ જિલ્લામાં અતિભારે વરસાદનું ઓરેન્જ એલર્ટ જાહેર કરાયું છે.

હવામાન વિભાગના જણાવ્યાં મુજબ, ઉત્તર-પશ્ચિમ મધ્યપ્રદેશમાં લો-પ્રેશર સક્રિય છે, જ્યારે બંગાળની ખાડીમાં સર્જાયેલું નવું લો-પ્રેશર આગામી 24 કલાકમાં 'ડિપ્રેશન'માં ફેરવાઈ શકે છે. આ ઉપરાંત મોન્સૂન ટ્રફ, શિયર ઝોન અને બે વેસ્ટર્ન ડિસ્ટર્બન્સ પણ સક્રિય છે. દરિયાકાંઠે  30 થી 40 કિમી- કલાકની ઝડપે પવન ફૂંકાવવાની અને દરિયો રફ રહેવાની શક્યતા હોવાથી માછીમારોને દરિયો ન ખેડવા કડક સૂચના આપવામાં આવી છે.