અમરેલી જિલ્લામાં મેઘરાજાની ધમાકેદાર એન્ટ્રી: સાવરકુંડલાની નાવલી નદીમાં પૂરની સ્થિતી, ખેડૂતોમાં ખુશીનો માહોલ

સાવરકુંડલા અને ઉપરવાસના વિસ્તારોમાં પડેલા ભારે વરસાદના કારણે સ્થાનિક નાવલી નદીમાં પાણીની જોરદાર આવક થઈ છે. પ્રથમ વરસાદમાં જ નદીમાં પૂર જેવી સ્થિતિ સર્જાઈ છે. નદીના પાણીના પ્રવાહમાં નોંધપાત્ર વધારો થતાં વહેતા પૂરના દ્રશ્યો જોવા મળ્યાં હતા, જેને નિહાળવા માટે સ્થાનિક લોકો પણ ઉમટી પડ્યા હતા.

છેલ્લા ઘણા દિવસોથી પડી રહેલી અસહ્ય ગરમી અને બફારાથી હેરાન પરેશાન થઈ ગયેલા નાગરિકોને આ ધોધમાર વરસાદથી મોટી રાહત મળી છે. વરસાદના પગલે સાવરકુંડલા શહેર સહિત આસપાસના વિસ્તારોના વાતાવરણમાં ભારે ઠંડક પ્રસરી ગઈ છે અને લોકોએ ગરમીથી છૂટકારો મેળવ્યો છે.

આ વર્ષે લાંબા સમય બાદ આ પ્રકારે સારો અને સાર્વત્રિક વરસાદ પડતાં સૌથી વધુ ખુશી ખેડૂતોમાં જોવા મળી રહી છે. આ વરસાદ વાવણી લાયક હોવાથી ખેડૂતોમાં હવે ખેતીકામ શરૂ કરવાનો ભારે ઉત્સાહ જોવા મળી રહ્યો છે અને ગ્રામ્ય અર્થતંત્રમાં નવી આશાનો સંચાર થયો છે.

આ પ્રથમ વરસાદે જ સાવરકુંડલા પંથકને જળબંબોળ કરી મૂક્યો છે અને નદી-નાળા જીવંત થતાં ખેડૂતો પણ ખુશ છે.