અસહ્ય ગરમી વચ્ચે અમદાવાદમાં વરસાદની જોવાતી રાહ, બીજી તરફ 12 કલાકમાં 145 તાલુકાઓમાં વરસાદ

સ્ટેટ ઈમરજન્સી ઓપરેશન સેન્ટરના આંકડાઓ પ્રમાણે, નવસારીના વાંસદામાં સૌથી વધુ 4.88 ઈંચ વરસાદ પડ્યો હતો. ચીખલીમાં 4.02 ઈંચ, કપરાડામાં 3.86 ઈંચ, વઘાઈમાં 3.66 ઈંચ, બારડોલીમાં 3.58 ઈંચ, ગણદેવીમાં 3.46 ઈંચ, નવસારીમાં 3.31 ઈંચ, નાનાપોંઢામાં 3.27 ઈંચ, પલસાણામાં 3.23 ઈંચ, જલાલપોરમાં 3.11 ઈંચ, ડાંગમાં 2.95 ઈંચ વરસાદ પડ્યો હતો.
 
ગુજરાતમાં હવામાન વિભાગે  બુધવારે નવસારી, વલસાડ, દમણ અને દાદરા નગર હવેલીમાં કેટલાક સ્થળોએ ભારેથી અતિભારે વરસાદની આગાહી કરી છે. આ ઉપરાંત આજે  ચોમાસાની ઋતુમાં  વરસાદની સંભાવનાઓને ધ્યાનમાં રાખીને સ્ટેટ ઈમરજન્સી ઓપરેશન સેન્ટર ગાંધીનગર ખાતે રાહત કમિશનરના અધ્યક્ષસ્થાને વેધર વૉચ ગ્રુપની બેઠક યોજાઈ હતી. 

આ બેઠકમાં ચોમાસા દરમિયાન વરસાદી પરિસ્થિતિ સામે નાગરિકોની સુરક્ષા અને આપત્તિ વ્યવસ્થાપન માટેની વહીવટી તંત્રની પૂર્વતૈયારીઓની સર્વગ્રાહી સમીક્ષા કરવામાં આવી હતી. 

બેઠકમાં રાહત કમિશનર  ગૌરાંગ મકવાણાએ તમામ સંબંધિત વિભાગો પાસેથી માહિતી મેળવીને આ વિભાગોને પરસ્પર સુદ્રઢ સંકલન જાળવવા અનુરોધ કર્યો હતો. તેમણે કોઈપણ કટોકટી વખતે સ્ટેટ કંટ્રોલ રૂમને તરત જાણ કરવા સૂચના આપી હતી. 

હવામાન વિભાગના જણાવ્યા અનુસાર ગુજરાતમાં સાયક્લોનિક સર્ક્યુલેશન અને અરબી સમુદ્રમાં સર્જાયેલી હવામાન સિસ્ટમના કારણે આગામી સાત દિવસ દરમિયાન હળવાથી મધ્યમ અને કેટલાક વિસ્તારોમાં ભારેથી અતિભારે વરસાદની શક્યતા છે. 

જેમાં ખાસ કરીને દક્ષિણ ગુજરાતમાં વ્યાપક વરસાદની આગાહી કરવામાં આવી છે. તા. 22 જુલાઇના રોજ દક્ષિણ ગુજરાતના નવસારી, વલસાડ તેમજ દમણ અને દાદરા નગર હવેલીમાં કેટલાક સ્થળોએ ભારેથી અતિભારે વરસાદ થવાની સંભાવના છે.