આરોપીઓનું સરઘસ કાઢવા મામલે રાજદીપસિંહ નકુમને શો કોઝ નોટિસ, 15 દિવસમાં ખુલાસો માંગ્યો

હાઇકોર્ટમાં સુનાવણી દરમિયાન કોર્ટે સવાલ કર્યો હતો કે, શું પ્રાથમિક તપાસ દરમિયાન તેઓ (રાજદીપસિંહ નકુમ) ઉપસ્થિત રહ્યાં હતા ?” જેના જવાબમાં સરકારી વકીલે સ્પષ્ટતા કરી હતી કે, અધિકારીએ પોતાનું નિવેદન નોંધાવ્યું છે. નિયમ મુજબ આગળની કોઈ પણ કાયદેસરની કાર્યવાહી કરતાં પહેલાં શો કોઝ નોટિસ પાઠવવી અનિવાર્ય છે. આ તપાસ રિપોર્ટ મળેલી ફરિયાદોને આધારે તૈયાર કરવામાં આવ્યો છે અને કેટલાક પક્ષકારો દ્વારા જુદી જુદી જગ્યાએ સતત રજૂઆતો થઈ રહી છે. 

સુરત પોલીસના એડિશનલ કમિશનર ઓફ ક્રાઈમ દ્વારા સમગ્ર મામલે પ્રાથમિક તપાસ અહેવાલ તૈયાર કરી ડીજીપી કચેરી તેમજ ગૃહ વિભાગને મોકલાયો છે. હાઇકોર્ટે આ કેસની આગામી સુનાવણી 19 ઓક્ટોબરના રોજ નિયત કરી છે, જેમાં નકુમ સામે લેવાયેલા પગલાં અંગેનો પ્રોગ્રેસ રિપોર્ટ રજૂ કરવામાં આવશે.

જુલાઈ 2026 માં સુરતના સલાબતપુરા પોલીસ મથક વિસ્તારમાં હત્યાના પ્રયાસનો ગુનો નોંધાયો હતો. આ ગુનામાં પકડાયેલા પાંચ આરોપીઓને કાયદાનો પાઠ ભણાવવાના બહાને ડીસીપી રાજદીપસિંહ નકુમે સુપ્રીમ કોર્ટ અને રાજ્ય પોલીસ વડાની માર્ગદર્શિકા તથા આદેશોની અવગણના કરીને જાહેર માર્ગો પર આરોપીઓનું સરઘસ કાઢ્યું હતું.

આ સરઘસ દરમિયાન થોડા- થોડા અંતરે આરોપીઓને ઊભા રાખી, તેમના વાળ પકડીને લાફા ઝીંકવામાં આવ્યાં હતા, તેમજ દંડાથી ઢોર માર મરાયો હતો. જે સમગ્ર મામલો હાઇકોર્ટના દ્વારે પહોંચ્યો હતો.