કણભા પોલીસ સ્ટેશનના એ.એસ.આઈ અને જી.આર.ડી જવાન આટલા રૂપિયાની લાંચ લેતા ઝડપાયા

મળતી વિગતો મુજબ, એક જાગૃત નાગરિકની દસ્ક્રોઇ તાલુકાના ધામતવાણ વિસ્તારમાં કોસ્મેટિક ચીજવસ્તુઓ ઉત્પાદન કરવાની ફેક્ટરી આવેલી છે. ગત 14 મે 2026 ના રોજ કણભા પોલીસ સ્ટેશનના અનાર્મ્ડ ASI ભાવેશભાઇ લાભશંકર રાવલ, GRD સભ્ય કમલેશભાઇ ઉર્ફે રોબર્ટ વિનોદભાઇ બારોટ, GRD સભ્ય રણજીતભાઇ જશુભાઇ સોલંકી અને અન્ય એક વ્યક્તિ ફેક્ટરી પર પહોંચ્યાં હતા. તેઓએ ફેક્ટરીના માલિકને તમે માલસામાન ઉપર નવી તારીખ છાપીને એક્સપાયર થયેલો માલ કેમ વેચો છો ? તેમ કહીને કેસ કરવાની અને જેલમાં પૂરી દેવાની ધમકી આપી હતી.

આ કેસ ન કરવાના અવેજ પેટે આરોપીઓએ શરૂઆતમાં રૂ. 2,00,000 ની લાંચની માંગણી કરી હતી. જો કે, રકઝકના અંતે રૂ. 30,000 આપવાનું નક્કી થયું હતું. બીજા દિવસે એટલે કે 15 મે ના રોજ, GRD સભ્ય રણજીત સોલંકી ફેક્ટરી પર રૂ. 30,000 લેવા માટે ગયો હતો. પરંતુ તે સમયે ફેક્ટરી માલિક પાસે પૈસાની સગવડ ન હોવાથી પછી પૈસા આપવાની વાત થઇ હતી. 

ફરિયાદી લાંચના નાણાં આપવા માંગતા ન હોવાથી તેઓએ તાત્કાલિક એ.સી.બી.નો સંપર્ક કર્યો હતો. ફરિયાદના આધારે 16 મે 2026 ના રોજ ACB ની ટીમ દ્વારા બાકરોલ પોલીસ ચોકીના કમ્પાઉન્ડમાં લાંચનું છટકું ગોઠવવામાં આવ્યું હતું.

ટ્રેપ દરમિયાન ASI ભાવેશભાઇ રાવલે ફરિયાદીને ફોન કરીને લાંચના નાણાં બીજા આરોપી કમલેશ ઉર્ફે રોબર્ટ બારોટને આપી દેવા જણાવ્યું હતું. રોબર્ટે ફરિયાદી સાથે લાંચ અંગે હેતુલક્ષી વાતચીત કરી રૂ. 30,000 સ્વીકારતા જ ACB ની ટીમે તેને રંગેહાથ દબોચી લીધો હતો.

ટ્રેપ કરનાર અધિકારી: ડી.બી.ગોસ્વામી (પોલીસ ઇન્સ્પેક્ટર, અમદાવાદ ગ્રામ્ય એ.સી.બી. પો.સ્ટે.)

સુપરવિઝન અધિકારી: એમ.એચ.પુવાર (મદદનીશ નિયામક, એ.સી.બી. અમદાવાદ એકમ)

ઇન્ચાર્જ અધિકારી: હરેશ મેવાડા (નાયબ નિયામક, એ.સી.બી. અમદાવાદ)