મારું અપહરણ નથી થયું, પતિ સાથે રહું છું: કિંજલ રબારી HCમાં હાજર, FIR પર સ્ટે

સુનાવણી દરમિયાન કોર્ટે કિંજલને સીધો સવાલ પૂછ્યો હતો કે, તમે તમારી મરજીથી રહો છો ? કોઈએ તમારું કિડનેપિંગ કર્યું છે?  તેના ઉત્તરમાં કિંજલે સ્પષ્ટતા કરી હતી કે, ના, મારું કોઈ અપહરણ થયું નથી. હું સંપૂર્ણ સ્વેચ્છાએ અને મારી મરજીથી અશોક ચૌધરી સાથે રહું છું. કિંજલના વકીલે કોર્ટને જણાવ્યું હતું કે કિંજલ 24 વર્ષની પુખ્ત યુવતી છે અને તે તેના કાયદેસરના પતિ અશોક ચૌધરી સાથે પોતાનું દાંપત્યજીવન વિતાવવા માંગે છે.

કિંજલે કોર્ટમાં અગાઉની ઘટનાનો ઉલ્લેખ કરતાં જણાવ્યું કે, અગાઉ જ્યારે હેબિયસ કોર્પસ અરજી થઈ હતી ત્યારે પરિવારના ભારે દબાણને કારણે તેણે અશોક સાથે જવાનો ઇનકાર કરીને પરિવાર સાથે રહેવું પડ્યું હતું, પરંતુ હવે તે સ્વેચ્છાએ પાછી આવી છે.

બંને પક્ષકારોની રજૂઆતો સાંભળ્યાં બાદ કોર્ટે અવલોકન કર્યું હતું કે અરજદારોના જીવને જોખમ છે. તેથી, સરકારી વકીલે પોલીસ કમિશનર પાસે બંનેના જીવનની સુરક્ષા સુનિશ્ચિત કરવી જોઈએ તેવી માંગ કરી હતી, આ સાથે જ હાઈકોર્ટે ચાંદખેડા પોલીસ મથકે મુકેશ દેસાઈ દ્વારા નોંધાવવામાં આવેલી અપહરણની એફઆઈઆર પર આગળની કાર્યવાહી સામે સ્ટે આપ્યો છે. કોર્ટે ફરિયાદી અને પોલીસ સહિતના પક્ષકારોને વિધિવત નોટિસ જારી કરી વધુ સુનાવણી મુલતવી રાખી છે.

ઉલ્લેખનીય છે કે, 6 સપ્ટેમ્બરના રોજ ચાંદખેડામાંથી કિંજલ રબારીનું અજાણ્યા શખ્સો કારમાં અપહરણ કરી ગયા હોવાની મુકેશ દેસાઈએ પોલીસ કંટ્રોલ રૂમમાં ફરિયાદ નોંધાવી હતી. જો કે, પોલીસે સીસીટીવી ફૂટેજ તપાસતાં કિંજલ કોઈપણ જાતના દબાણ વગર પોતાની મરજીથી જ કારમાં બેસતી જોવા મળી હતી. ત્યાર બાદ કિંજલનો વીડિયો વાયરલ થયો હતો, જેમાં તેણે અપહરણની વાતને નકારી કાઢી અશોક ચૌધરી સાથે સ્વેચ્છાએ ગઈ હોવાનું જણાવ્યું હતું અને પોલીસ કમિશનરને લેખિત અરજી મોકલી હતી.