સિક્યોરિટી ગાર્ડે વિદ્યાર્થીની પર કર્યો બળાત્કાર, મધરાતે PI ની રિવોલ્વર ઝૂંટવી ભાગવાનો પ્રયાસ કરતાં પોલીસે મારી ગોળી

પોલીસે જણાવ્યું હતું કે આરોપી ધરમ સિંહ જે મૂળ ઉત્તર પ્રદેશના હરદોઈ જિલ્લાનો રહેવાસી છે, તેણે શનિવારે મોડી રાત્રે ટેરેસ પર ચાલવા ગયેલી વિદ્યાર્થીનીનું ગળું દબાવીને બળાત્કાર કર્યો હતો. ત્યાર બાદ તેને ટેરેસ પર બંધ કરી દીધી હતી અને ઘટના સ્થળેથી ભાગી ગયો હતો.

ઘટના સીસીટીવીમાં કેદ થઈ હતી, જેમાં ગાર્ડ લિફ્ટ અને સીડી દ્વારા ટેરેસ પર જતો દેખાતો હતો. ગુનો કર્યા પછી, આરોપીએ પોલીસ લોકેશન ટ્રેકિંગથી બચવા માટે તેનો મોબાઇલ ફોન બંધ કરી દીધો હતો.

જો કે, પોલીસ, સ્થાનિક ગુના શાખા અને ક્રાઇમ બ્રાન્ચની 10 સંયુક્ત ટીમોએ વિસ્તારના CCTV ફૂટેજ સ્કેન કર્યા અને વ્યાપક સર્ચ ઓપરેશન હાથ ધર્યું હતું. હેબતપુર વિસ્તારમાંથી ધરમ સિંહની ધરપકડ કરી હતી.

બાદમાં મધરાતે દુષ્કર્મના આરોપી ધરમસિંહે પંચનામા વખતે પોલીસ પર અચાનક હુમલો કરી ભાગવાનો કર્યો હતો, જેથી પોલીસે તેને પગમાં ગોળી મારી હતી, જેને કારણે આરોપી લોહીલુહાણ હાલતમાં નીચે ઢળી પડ્યો હતો. આ ઝપાઝપીમાં એક પોલીસકર્મી ઘાયલ થયા હતા.

તપાસમાં જાણવા મળ્યું કે આરોપીએ આ આનંદનગર સોસાયટીમાં જોડાતા પહેલા અમદાવાદની ઘણી અન્ય કંપનીઓમાં ગાર્ડ તરીકે કામ કર્યું હતું.

પોલીસે સ્પષ્ટતા કરી છે કે આરોપીને નોકરી પર રાખનારી સુરક્ષા એજન્સીએ ન તો તેની પૃષ્ઠભૂમિ તપાસ કરી હતી, ન તો તેને જરૂરી તાલીમ આપી હતી,પોલીસ આ બેદરકારી બદલ સુરક્ષા એજન્સી સામે કડક કાનૂની કાર્યવાહી પણ કરશે.