અમદાવાદ એરપોર્ટ પરથી રૂ. 4 કરોડનો ગાંજો ઝડપાયો, મહારાષ્ટ્રનો યુવક બેંગકોકથી આવ્યો હતો

પકડાયેલો મુસાફર થાઈલેન્ડના બેંગકોક શહેરથી ફ્લાઈટ મારફતે અમદાવાદ એરપોર્ટ પર ઉતર્યો હતો. કસ્ટમ વિભાગની ટીમે જ્યારે તેની ટ્રોલી બેગની સઘન તલાશી લીધી, ત્યારે અધિકારીઓ ચોંકી ઉઠ્યા હતા. મુસાફરે કસ્ટમ સ્કેનિંગ અને સુરક્ષા એજન્સીઓની આંખમાં ધૂળ નાખવા માટે એક અનોખી તરકીબ અજમાવી હતી. તેણે ટ્રોલી બેગમાં ખાણી-પીણીના અને ખાદ્ય સામગ્રીના પેકેટ્સ રાખ્યા હતા, જેની અંદર ડ્રગ્સના 22 પેકેટ સંતાડ્યાં હતા.

બેગમાંથી શંકાસ્પદ પેકેટ્સ મળી આવ્યાં બાદ કસ્ટમ વિભાગના ઉચ્ચ અધિકારીઓની હાજરીમાં ફીલ્ડ ટેસ્ટ કીટ દ્વારા તે પદાર્થનું કેમિકલ ટેસ્ટિંગ કરવામાં આવ્યું હતું. આ તપાસના અંતે પેકેટ્સમાં રહેલો નશીલો પદાર્થ સામાન્ય ગાંજો નહીં, પરંતુ આંતરરાષ્ટ્રીય બજારમાં ઊંચી કિંમતે વેચાતો હાઇડ્રોપોનિક ગાંજો હોવાનું સામે આવ્યું હતું. કસ્ટમ વિભાગે મુસાફર પાસેથી કુલ 4.276 કિલોગ્રામ હાઇડ્રોપોનિક ગાંજાનો જથ્થો જપ્ત કર્યો છે.

આ ગેરકાયદે હેરાફેરીના મામલે કસ્ટમ વિભાગે 40 વર્ષીય મુસાફરની અટકાયત કરીને પૂછપરછ હાથ ધરી છે. પ્રાથમિક તપાસમાં સામે આવ્યું છે કે, પકડાયેલો આરોપી મૂળ મહારાષ્ટ્રનો રહેવાસી છે. તે પહેલી જ ઇન્ટરનેશનલ ટ્રિપ પર ગયો હતો.

કસ્ટમ્સ વિભાગ દ્વારા આરોપી સામે NDPS એક્ટ હેઠળ ગુનો નોંધીને આ ડ્રગ્સ નેટવર્કના મૂળ સુધી પહોંચવા માટે તપાસના ચક્રો ગતિમાન કરાયા છે.