ભાવનગરના યુવકે ઉ.પ્રદેશમાં પ્રેમિકાની હત્યા કરીને શરીરના 3 ટુકડા કરી નાખ્યાં, પગનો નિકાલ કરવા જતા ઝડપાયો

પોલીસે આ મામલે તપાસ શરૂ કરી હોવાની જાણ થતાં આરોપી તેની પ્રેમિકાના શરીરના બાકીના અંગોનો નિકાલ કરવા જઈ રહ્યો હતો. પોલીસને જોઇને આરોપી ભાગવાનો પ્રયાસ કરતા તેના પગમાં ગોળી મારી હતી.  

પોલીસે તેની પાસેથી ગરાસા (લાંબા હાથાવાળું ભારે કાપવાનું હથિયાર), તેની પ્રેમિકાનો કપાયેલો પગ અને અન્ય વસ્તુઓ કબ્જે કરી છે. પોલીસની ગોળીબારમાં ઘાયલ થયેલા પ્રેમીને સારવાર માટે હોસ્પિટલમાં મોકલવામાં આવ્યો છે. આ ઘટના જૌનપુરના મરિયાહુ કોતવાલી પોલીસ સ્ટેશન વિસ્તારમાં બની હતી. આરોપીની ઓળખ ભાવનગરના વતની ભૂપેન્દ્રભાઈ ખાખરિયાના પુત્ર હેમલ ખાખરિયા ઉર્ફે દિલીપ (ઉં.42 વર્ષ) તરીકે થઈ છે. તે હાલમાં ટીચર્સ કોલોનીમાં ભાડાના રૂમમાં રહેતો હતો.

મૃતકની ઓળખ વારાણસીના બાબતપુરની રહેવાસી રેશ્મા ખાતૂન ઉર્ફે સના તરીકે કરવામાં આવી છે. દિલીપ 4 જુલાઈની રાત્રે સનાને તેના ભાડાના રૂમમાં લાવ્યો હતો. સના અન્ય કોઈ પુરુષ સાથે વાત કરતી હોવાની શંકાને કારણે તેમની વચ્ચે બોલાચાલી થઈ હતી. તે જ રાત્રે વોટ્સએપ ચેટ્સ તપાસવા બાબતે આ વિવાદ વકર્યો હતો. આવેશમાં આવીને તેણે સૂતેલી સનાનું ગળું છરી વડે કાપી નાખીને તેની હત્યા કરી હતી. 

ત્યાર બાદ તેણે તેના મૃતદેહના 3 ટુકડા કરી નાખ્યા હતા. પહેલા 2 ટુકડા જંગલમાં ફેંકી દીધા હતા અને બીજી રાતે પગ ફેંકવા જતા પોલીસે તેને ઝડપી લીધો હતો. પોલીસે આરોપીની ધરપકડ કરીને આગળની કાર્યવાહી હાથ ધરી છે.