ACB ટ્રેપઃ ઝાલોદમાં PM આવાસ યોજનાના હપ્તા પેટે રૂ. 10,000 ની લાંચ લેતા એન્જિનિયર સહિત બે પકડાયા

જયેશકુમાર જયંતીલાલ પટેલ (ઉં.વ. 35, એન્જિનિયર - અફોર્ડેબલ હાઉસિંગ મિશન, ઝાલોદ નગરપાલિકા, 11 માસ કરાર આધારિત). મૂળ રહે. કાંસા, તા. વિસનગર, જી. મહેસાણા (હાલ રહે. ઝાલોદ) તથા મનુભાઈ ચંદુભાઈ વસૈયા (ઉં.વ. 49, ધંધો: વેપાર, રહે. મુવાડા રાયણ ફળિયું, તા. ઝાલોદ, જી. દાહોદ) એસીબીના છટકામાં સપડાયા હતા.

ફરિયાદીને પ્રધાનમંત્રી શહેરી આવાસ યોજના હેઠળ આવાસ મંજૂર થયું હતું. તેના પ્રથમ હપ્તા રૂ. 70,000 વખતે રૂ. 5000 અને બીજા હપ્તાના રૂ. 80,000 વખતે રૂ. 10,000 લાંચ પેટે ચૂકવવામાં આવ્યાં હતા. ત્યાર બાદ ત્રીજો હપ્તો રૂ. 1,50,000 બેંક ખાતામાં જમા થતાં આરોપી જયેશકુમાર પટેલ દ્વારા ફરીથી રૂ.10,000 ની લાંચની માંગણી કરવામાં આવી હતી.

ફરિયાદી લાંચ આપવા માંગતા ન હોવાથી તેમણે મહીસાગર એ.સી.બી. નો સંપર્ક કર્યો હતો. લાંચના ગોઠવાયેલા છટકા દરમિયાન, આરોપી જયેશકુમાર પટેલના કહેવાથી આરોપી મનુભાઈ વસૈયાએ ફરિયાદી પાસેથી રૂ.10,000 ની લાંચની રકમ પંચની હાજરીમાં સ્વીકારી હતી. ત્યારે જ એ.સી.બી.ની ટીમે બંને આરોપીઓને ઝડપી પાડીને કાયદેસરની કાર્યવાહી હાથ ધરી હતી.

એ.સી.બી. કામગીરી કરનાર અધિકારીઓ

ટ્રેપિંગ અધિકારી:  એમ.એમ. તેજોત, પો.ઈન્સ., મહીસાગર એ.સી.બી. પો.સ્ટે., લુણાવાડા.

સુપરવિઝન અધિકારી:  બી.એમ. પટેલ, મદદનીશ નિયામક, એ.સી.બી. પંચમહાલ એકમ, ગોધરા.

ઇન્ચાર્જ અધિકારી:  બળદેવ દેસાઈ (IPS), નાયબ નિયામક, એ.સી.બી. વડોદરા.