અમદાવાદ: બલોલનગર બ્રિજ પર ભયાનક અકસ્માત, બાઈક ચાલક બ્રિજ પરથી નીચે પટકાયો

મળતી માહિતી મુજબ, એક બાઈક ચાલક પોતાની મોટરસાઈકલ લઈને પૂરઝડપે બ્રિજ પરથી પસાર થઈ રહ્યો હતો. દરમિયાન બાઈક અચાનક ડિવાઇડર સાથે અથડાયું હતું, ત્યાર બાદ બ્રિજની પાળી સાથે ભટકાતા ચાલક હવામાં ઉછળીને સીધો બ્રિજ નીચે પટકાયો હતો.

ઊંચાઈ પરથી નીચે પતકાવાને કારણે બાઈક ચાલકને શરીરે ગંભીર ઈજાઓ પહોંચી હતી.ઘટના સ્થળે હાજર લોકો દ્વારા ઈજાગ્રસ્તને તાત્કાલિક સારવાર અર્થે સોલા સિવિલ હોસ્પિટલ ખસેડવામાં આવ્યો છે. આ મામલે એલ ડિવિઝન પોલીસે અકસ્માતનો ગુનો નોંધી વધુ તપાસ હાથ ધરી છે.

નોંધનીય છે કે બલોલનગર બ્રિજ પર અકસ્માતની આ કોઈ પ્રથમ ઘટના નથી. થોડા સમય અગાઉ પણ આ જ રીતે એક ટુ-વ્હીલર ચાલક બ્રિજ પરથી નીચે ખાબક્યો હતો, જેમાં તેનું મોત નીપજ્યું હતું.