ઉસને મુજે છોડ દિયા, ડિવોર્સ દે દિયા. મેં અબ ઉસકે બિના નહીં રહે સકતી.. 17 વર્ષની સગીરાએ સાબરમતી નદીમાં ઝંપલાવ્યું

ફરિયાદ અનુસાર, નારોલમાં રહેતી સગીરાને આણંદના ફરદીન શેખ નામના યુવક સાથે પ્રેમસંબંધ હતો. બંને પરિવારની સંમતિથી આશરે 6 મહિના અગાઉ તેમના લગ્ન કરાવવામાં આવ્યા હતા. લગ્ન બાદ સગીરા પતિ સાથે આણંદ રહેતી હતી, પરંતુ થોડા સમયમાં જ બંને વચ્ચે અણબનાવ શરૂ થયો હતો.

ગત 3 ઓગસ્ટે પતિ ફરદીને સગીરાને ઘરમાંથી કાઢી મૂકતાં તે પિતાના ઘરે નારોલ આવી ગઈ હતી. ગત 10 ઓગસ્ટે સગીરા પોતાના લગ્નનો આલ્બમ જોઈને રડી રહી હતી અને પતિને ફોન કરીને તેને સાથે રાખવા વિનંતી કરી હતી. પરંતુ પતિએ સાથે રાખવાની ચોખ્ખી ના પાડી દેતાં સગીરા ભારે હતાશામાં સરકી પડી હતી.

સગીરા ગભરામણ થાય છે, બહાર જઈને આવું કહીને સવારે 11 વાગ્યે ઘરેથી નીકળી ગઈ હતી. સાબરમતી રિવરફ્રન્ટ પહોંચીને તેણે એક વીડિયો બનાવ્યો હતો અને પોતાની બહેનને મોકલ્યો હતો. વીડિયોમાં તેણે જણાવ્યું હતું કે, "મેં આપની મરજી સે મર રહી હું અમ્મી...મુજે મેરી અમ્મી, ભાઈઓ ઓર ફૂફાને બહુત અચ્છા રખા, મેરી હર ખુશી પૂરી કી...પર ઉસને મુજે છોડ દિયા, ડિવોર્સ દે દિયા. મેં અબ ઉસકે બિના નહીં રહ સકતી. મેંને ઉસસે બહુત માફી માંગી, પર ઉસકો એક પલ મેરે પર દયા નહીં આઈ... તુ મેરી રૂહ કો તો માર હી ચુકા હૈ, ઓર આજે મેં અપને શરીર કો ભી માર રહી હું.

વીડિયો મોકલ્યા બાદ સગીરાએ સાબરમતી નદીમાં છલાંગ લગાવી દીધી હતી. પરિવારજનોએ શોધખોળ શરૂ કરી હતી, પરંતુ બપોરે આશરે 3 વાગ્યે સાબરમતી નદીમાંથી એક લાશ તરતી મળી આવી હતી. ફાયર બ્રિગેડની ટીમે મૃતદેહ બહાર કાઢતાં તે સગીરાનો જ હોવાનું ખુલ્યું હતું.

પોલીસે પોસ્ટેમોર્ટમ કરાવી મૃતદેહ પરિવારજનોને સોંપ્યો છે. સગીરાના અંતિમ વીડિયો અને પિતાની રજૂઆતોના આધારે પોલીસે ફરદીન સામે ગુનો નોંધી આગળની તપાસ શરૂ કરી છે.