અદાણી ગ્રુપના નિશાને પત્રકાર, ધ વોશિંગ્ટન પોસ્ટના રવિ નાયર સામે અમદાવાદ ક્રાઇમ બ્રાન્ચમાં ફરિયાદ

આ મામલે અમદાવાદ ક્રાઇમ બ્રાન્ચે ફરિયાદ દાખલ કરી છે, જેમાં અદાણી દ્વારા કહેવામાં આવ્યું છે કે આ અહેવાલ ખોટા અને બદનામ કરનારા હતા, જેથી પત્રકાર સામે ફરિયાદ દાખલ કરવામાં આવી છે.

પત્રકારે બનાવટી દસ્તાવેજો રજૂ કર્યાનો દાવો 

નવરંગપુરામાં આવેલા અદાણી હાઉસના ડેપ્યુટી જનરલ મેનેજરે અમદાવાદ ક્રાઈમ બ્રાન્ચમાં આ ફરિયાદ નોંધાવી છે કે, ગત 24મી ઓક્ટોબરના રોજ ધ વોશિંગ્ટન પોસ્ટના ઈ-પેપરમાં એક આર્ટિકલ પ્રકાશિત થયો હતો. આ આર્ટિકલમાં દાવો કરવામાં આવ્યો હતો કે ભારત સરકાર અને જીવન વીમા નિગમ (LIC)અદાણી ગ્રૂપની કંપનીઓમાં જાહેર ભંડોળમાંથી 3.9 અબજ ડોલરનું રોકાણ કરવા જઈ રહ્યાં છે. આ અહેવાલમાં ચોક્કસ દસ્તાવેજોનો હવાલો આપીને રોકાણની શરતો, બોન્ડ રેટિંગ અને આંતરિક મંજૂરીઓનો ઉલ્લેખ કરવામાં આવ્યો હતો.

આ આર્ટિકલ દિલ્હીમાં રહેતા પત્રકાર રવિ નાયર દ્વારા લખવામાં આવ્યો હતો. આ અહેવાલ સામે આવતા જ LICએ તેના સોશિયલ મીડિયા પ્લેટફોર્મ પર સ્પષ્ટતા કરી હતી કે આ સમાચાર ખોટા છે અને LIC પોતાના તમામ રોકાણો નિયમોનુસાર જ કરે છે. એલઆઈસીની આ સ્પષ્ટતાના જવાબમાં રવિ નાયરે સોશિયલ મીડિયા પર કેટલાક  દસ્તાવેજો રજૂ કર્યા હતા. અદાણી ગ્રૂપે જ્યારે આ બાબતે પત્રકાર પાસે ખુલાસો માંગ્યો ત્યારે તેઓએ કોઇ યોગ્ય જવાબ આપ્યો ન હતો, જેથી હવે તેમની સામે ક્રાઇમ બ્રાન્ચમાં ફરિયાદ દાખલ કરી છે.