ડીસામાં ACB ટ્રેપઃ કોન્ટ્રાક્ટરનું લાયસન્સ આપવા રૂ. 50 હજાર માંગનાર મદદનીશ અધિક્ષક અને વચેટિયો રંગેહાથ ઝડપાયા

એક જાગૃત નાગરિકે ડીસા સિંચાઈ વિભાગ (દાંતીવાડા) ખાતે કોન્ટ્રાક્ટરનું લાયસન્સ મેળવવા નિયમાનુસાર અરજી કરી હતી. આ લાયસન્સ કાઢી આપવાના અવેજ પેટે સિંચાઈ વિભાગના મદદનીશ અધિક્ષક (હેડ ક્લાર્ક, વર્ગ-3) નિમેષભાઈ જશુભાઈ પટેલ તથા ખાનગી વ્યક્તિ ચમનભાઈ નાનજીભાઈ મિસ્ત્રી (રહે. અયોધ્યા નગર, ભાભર)એ એકબીજાના મેળાપીપણામાં અરજદાર પાસે રૂ. 50,000 ની લાંચની માંગણી કરી હતી.

અરજદાર લાંચની રકમ ચૂકવવા માંગતા ન હોવાથી તેમણે પાલનપુર ACB પોલીસ સ્ટેશનનો સંપર્ક કરીને ફરિયાદ નોંધાવી હતી. ફરિયાદને આધારે બનાસકાંઠા ACB પોલીસ ઇન્સ્પેક્ટર બી.જે. જોષી તથા તેમની ટીમે ડીસા સિંચાઈ વિભાગ, દાંતીવાડા નહેર કોલોની ખાતે લાંચના છટકાનું આયોજન કર્યું હતું.

આ છટકા દરમિયાન આરોપીઓએ ફરીયાદી પાસેથી લાંચ પેટે રૂ. 50,000 ની માંગણી કરી નાણાં સ્વીકારતા જ ACB ની ટીમે બંનેને રંગે હાથ ઝડપી લીધા હતા, એસીબીના અધિકારીઓએ લાંચની રકમ રૂ. 50,000 આરોપીઓ પાસેથી રિકવર કરીને બંને આરોપીઓ વિરુદ્ધ ભ્રષ્ટાચાર નિવારણ અધિનિયમ હેઠળ ગુનો નોંધી આગળની કાયદેસરની કાર્યવાહી હાથ ધરી છે.