આણંદઃ મારી પત્નીને બાંગ્લાદેશ ન મોકલો, એક પતિએ ગુજરાત સરકારને કરી અપીલ

આણંદના એક વ્યક્તિએ પોતાની બાંગ્લાદેશી મૂળની પત્નીને દેશનિકાલ ન કરવા ગુજરાત સરકારને અપીલ કરી છે. પત્નીએ હિન્દુ ધર્મ અપનાવ્યો હોવાથી બાંગ્લાદેશમાં તેની જાનને જોખમ હોવાની અને તેમના બે બાળકોની માતા છૂટી પડી જવાની દલીલ રજૂ કરીને માનવીય ધોરણે રાહત માંગવામાં આવી છે.

લાંભવેલ ગામના રહેવાસી તરુણ પટેલને 2012-13 માં ફેસબુક દ્વારા બાંગ્લાદેશની કાજલ નામની યુવતી સાથે પ્રેમ થયો હતો. કાજલ કાયદેસર રીતે લગ્ન કરવા માટે પાસપોર્ટ મેળવી ન શકવાના કારણે, પરિવારના દબાણમાં અન્યત્ર લગ્ન ન કરવા પડે માટે અંદાજે 10 વર્ષ પહેલા ગેરકાયદેસર રીતે સરહદ પાર કરીને ભારત આવી હતી.

ગુજરાત પોલીસ દ્વારા ગેરકાયદેસર વસવાટ કરતા બાંગ્લાદેશી નાગરિકોને પકડવા માટે ઓપરેશન ચલાવવામાં આવી રહ્યું છે. આ ઝુંબેશ અંતર્ગત ક્રાઈમ બ્રાંચ દ્વારા કાજલની અટકાયત કરવામાં આવી છે અને તેને મહિલા આશ્રયગૃહમાં રાખીને ડિપોર્ટેશન (સ્વદેશ પરત મોકલવાની) પ્રક્રિયા હાથ ધરવામાં આવી છે.

તરુણ પટેલે ગુજરાતના નાયબ મુખ્યમંત્રી હર્ષ સંઘવીને અપીલ કરી છે કે તેમની પત્નીએ હિન્દુ ધર્મ અંગીકાર કરી લીધો છે અને બાંગ્લાદેશ પરત મોકલવામાં આવે તો કટ્ટરપંથી તત્વો દ્વારા તેના જીવનને જોખમ ઊભું થઈ શકે છે. તેમનું તથા તેમના બાળકોનું ભવિષ્ય બગડે નહીં તે માટે ભારતીય નાગરિકત્વ મેળવવાની તમામ કાયદાકીય પ્રક્રિયાનું પાલન કરવાની પણ તેમણે તૈયારી બતાવી છે.

આ મામલો ગુજરાત પોલીસ દ્વારા ગેરકાયદેસર બાંગ્લાદેશી સ્થળાંતર કરનારાઓ સામે રાજ્યવ્યાપી અભિયાન ઓપરેશન ડેલ્ટા હન્ટ દરમિયાન પ્રકાશમાં આવ્યો છે. આ મહિલાને લગભગ બે અઠવાડિયા પહેલા માન્ય દસ્તાવેજો વિના ભારતમાં રહેવાના આરોપસર અટકાયતમાં લેવામાં આવી હતી.