રાજ્યમાં 24 કલાકમાં 196 તાલુકાઓમાં વરસાદ, અમરેલીના ખાંભામાં 7.76 ઇંચ

ખાંભા સિવાય રાજુલામાં 6.73 ઇંચ, ઉનામાં 6.42 ઇંચ, ગણદેવીમાં 6.38 ઇંચ, મહુવા(ભાવનગર)માં 6.06 ઇંચ, ચીખલીમાં 5.67 ઇંચ, જલાલપોરમાં 4.84 ઇંચ, નવસારીમાં 4.8 ઇંચ, જાફરાબાદમાં 3.9 ઇંચ, સાવરકુંડલામાં 3.54 ઇંચ વરસ્યો હતો.

અમરેલી જિલ્લાના રાજુલા, જાફરાબાદ અને ખાંભા પંથકમાં વરસી રહેલા મુશળધાર વરસાદને કારણે જળાશયોમાં પાણીની ભારે આવક થઈ રહી છે, જેમાં રાજુલાનો ધાતરવડી ડેમ-2 ઓવરફ્લો થતાં વહીવટી તંત્ર દ્વારા તેના 6 દરવાજા ખોલી પાણી નદીમાં છોડવામાં આવી રહ્યું છે. ડેમમાંથી પાણી છોડાતા નીચાણવાળા ખાખબાઈ, હિંડોરણા, વડ, ભચાદર, કોવાયા અને ઉચેયા સહિત 8થી વધુ ગામોને સાવચેત રહેવા સૂચના અપાઈ છે.

હવામાન વિભાગે અત્યંત ભારેથી અતિભારે વરસાદની સંભાવનાને જોતાં આજે 8 જિલ્લામાં રેડ એલર્ટ અને 6 જિલ્લામાં ઓરેન્જ એલર્ટ જાહેર કર્યું છે. ગીરમાં ઉપરવાસના ભારે વરસાદને કારણે નદીઓ-નાળા છલકાયા છે અને જનજીવન અસ્તવ્યસ્ત બન્યું છે.   જુલાઈના પ્રારંભે જ રાજ્યમાં સાર્વત્રિક વરસાદ થતા મોટાભાગના જિલ્લાઓ કવર થઈ ચૂક્યા છે. જો કે, કચ્છ જિલ્લામાં હજી પણ વરસાદની ઘટ છે. કચ્છમાં સિઝનનો એક ટકા વરસાદ પણ વરસ્યો નથી.