જૂનાગઢમાં માતાની ક્રૂરતા: પથારીમાં પેશાબ કરનાર 6 વર્ષની દીકરીને વાયર અને વેલણથી ઢોર માર માર્યો

પ્રાથમિક તપાસ અનુસાર, ગર્ભવતી મહિલા હોસ્પિટલથી ઘરે પરત ફરી ત્યારે 6 વર્ષની બાળકીથી પથારીમાં પેશાબ  થઈ ગયો હતો. આ સામાન્ય બાબતે ઉશ્કેરાયેલી માતાએ  મોબાઈલના ડેટા કેબલ અને રોટલી બનાવવાના વેલણ વડે બાળકીને નિર્દયતાથી ફટકારી હતી.

બાળકીની ચીસો સાંભળી પાડોશીઓ બચાવવા દોડ્યા ત્યારે માતાએ શરમ અનુભવવાને બદલે આ અમારા ઘરનો મામલો છે કહીને ઝઘડો કર્યો હતો. સમગ્ર ઘટના પાડોશીએ મોબાઈલમાં કેદ કરી લીધી હતી.વાયરલ વીડિયોને આધારે ચાઈલ્ડ હેલ્પલાઈનની ટીમ સ્થળ પર પહોંચી હતી. બાળકીના મોં, પીઠ અને પગના ભાગે ઈજાના ઊંડા નિશાનો જોઈ અધિકારીઓ પણ દ્રવી ઊઠ્યા હતા. બાળકીએ ડરતા ડરતા ટીમ સમક્ષ માતાના અત્યાચારની આપવીતી જણાવી હતી.

બાળ સુરક્ષા વિભાગ દ્વારા 112 નંબર પર જાણ કરી પોલીસની મદદ મેળવાઈ હતી અને માતા સામે વિધિવત ફરિયાદ નોંધવામાં આવી હતી. બાળકીને હાલ સુરક્ષિત રીતે 'શિશુ મંગલ' સંસ્થામાં આશ્રય અપાયો છે. આગળની કાર્યવાહી માટે પરિવારને બાળ કલ્યાણ સમિતિ (CWC) અને સ્પેશિયલ કોર્ટ સમક્ષ રજૂ કરવામાં આવશે.