સિંહે વધુ એક બાળકનો ભોગ લીધો, કાકાનો હાથ પકડીને ગિરનાર ચઢતા 12 વર્ષના મયૂરના અવશેષો મળ્યાં

મહેમદાવાદ તાલુકાના મોડજ ગામથી એક પરિવાર ગિરનાર યાત્રા માટે આવ્યો હતો. વહેલી સવારે અંદાજે 5 વાગ્યાના સમયે પરિવાર ગિરનારની સીડીઓ ચઢી રહ્યો હતો. તે દરમિયાન લગભગ 50મા પગથિયાંની આસપાસ 12 વર્ષનો મયુરસિંહ મહેન્દ્રસિંહ ચૌહાણ પોતાના કાકાનો હાથ પકડીને પગથિયાં ચઢતો હતો અને અચાનક અંધારામાંથી એક સિંહ બહાર આવ્યો અને કિશોર પર હુમલો કરીને તેને મોઢામાં પકડી જંગલ તરફ ખેંચી ગયો હતો. 

આ તરફ ઘટનાની જાણ થતાં જ સ્થાનિક લોકો અને વન વિભાગના કર્મચારીઓ તાત્કાલિક સ્થળે દોડી આવ્યાં હતા. જંગલ વિસ્તારમાં સર્ચ ઓપરેશન હાથ ધરવામાં આવ્યું છે. અને માત્ર બાળકના અવશેષો મળી આવ્યાં છે. શોધખોળ દરમિયાન બાળકનો એક પગ, બુટ અને કપડાં મળી આવ્યાં હોવાનું જાણવા મળ્યું છે.  

આ સમગ્ર ઘટનાને લઈને બાળકના પરિવારજનો પર આભ તૂટી પડ્યું છે. આ હચમચાવતી ઘટનાએ ગિરનાર યાત્રા પર આવતા શ્રદ્ધાળુઓમાં ભયનો માહોલ ઉભો કર્યો છે અને સુરક્ષા વ્યવસ્થા વધુ મજબૂત બનાવવાની માંગ ઉઠી રહી છે.