નડિયાદમાં ACBની સફળ ટ્રેપ: જમીન માપણીના કામ માટે રૂ. 90 હજારની લાંચ લેતા લાયસન્સ સર્વેયર ઝડપાયો

મળતી વિગતો અનુસાર, આરોપી દિલીપસિંહ બુધાજી ઉર્ફે બુધાભાઇ ચૌહાણ, જેઓ નડિયાદ સ્થિત જિલ્લા નિરીક્ષક જમીન અને દફતર કચેરીમાં લાયસન્સ સર્વેયર તરીકે ફરજ બજાવે છે, તેમણે ફરિયાદી પાસે જમીન માપણીની કામગીરીના અવેજ પેટે લાંચની માંગણી કરી હતી.

ફરિયાદી તેમના નાના ભાઈ અને કાકાના દીકરાઓએ વર્ષ 2023માં રજિસ્ટર્ડ દસ્તાવેજથી ખેતીલાયક જમીન ખરીદી હતી. આ જમીન પર પોતપોતાના હિસ્સાની વહેંચણી કરવા માટે ફરિયાદીએ ગુજરાત સરકારની IORA વેબસાઇટ પર ઓનલાઇન અરજી કરી હતી. અરજીના આધારે આરોપી લાયસન્સ સર્વેયર દિલીપસિંહે જમીન પર જઈને હિસ્સા માપણી કરી ફરિયાદીનું નિવેદન લીધું હતું, પરંતુ જમીન માપણીનો ખૂંટો માર્યો ન હતો. જ્યારે ફરિયાદીએ ખૂંટો મારવા માટે જણાવ્યું, ત્યારે આરોપીએ જમીનની માપણી વ્યવસ્થિત કરી આપવા, કોઈ વાંધા ન કાઢવા અને કામગીરી પૂર્ણ કરવાના બદલામાં વ્યવહાર પેટે રૂ. 90,000ની લાંચની માંગણી કરી હતી.

ફરિયાદી લાંચની રકમ આપવા માંગતા ન હોવાથી તેમણે આણંદ એ.સી.બી. પોલીસ સ્ટેશનનો સંપર્ક કરીને ફરિયાદ નોંધાવી હતી. આ ફરિયાદના આધારે આજે, તારીખ 05 જૂન 2026ના રોજ એ.સી.બી.ની ટીમ દ્વારા નડિયાદ બસ સ્ટેશનની બહાર આવેલા સાંઇબાબા પકોડી સેન્ટર ખાતે લાંચનું છટકું  ગોઠવવામાં આવ્યું હતું.

આ ટ્રેપ દરમિયાન આરોપી દિલીપસિંહે ફરિયાદી સાથે લાંચની માંગણી અંગે હેતુલક્ષી વાતચીત કરી રૂ. 90,000ની લાંચની રકમ સ્વીકારી હતી. એ.સી.બી.ની ટીમે તુરંત જ ત્રાટકીને આરોપી પાસેથી લાંચની પૂરેપૂરી રકમ રિકવર કરી લીધી હતી અને પોતાના હોદ્દાનો દુરુપયોગ કરનાર સર્વેયરને ઝડપી પાડી કાયદેસરની કાર્યવાહી હાથ ધરી છે.

જીલ્લા નિરીક્ષક જમીન અને દફતર કચેરી, નડીયાદ, જી.ખેડા ખાતે ફરજ બજાવતા લાયસન્સ સર્વેયર, દીલીપસિંહ બુધાજી ઉર્ફે બુધાભાઇ ચૌહાણ રૂ.૯૦,૦૦૦/- ની લાંચ લેતા ઝડપાયા.@sanghaviharsh @PIYUSH_270871 @DeepakMeghani@InfoGujarat @HARESHM38109376#ACBGujarat #Gujarat #FightAgainstCorruption pic.twitter.com/0SL5n0mdV1

— ACB Gujarat (@ACBGujarat)

કામગીરી કરનાર અધિકારીઓ:

ટ્રેપિંગ અધિકારી:  આર.એન.વિરાણી (પોલીસ ઇન્સ્પેક્ટર, આણંદ એ.સી.બી. પો.સ્ટે.) તથા ટીમ

સુપરવિઝન અધિકારી:  એમ.એચ.પુવાર (મદદનીશ નિયામક, એ.સી.બી., અમદાવાદ એકમ)

ઇન્ચાર્જ અધિકારી:  હરેશ મેવાડા (નાયબ નિયામક, એ.સી.બી. અમદાવાદ) 

ટ્વીટ જુઓ ↗