અમદાવાદઃ NEET ની પરીક્ષાના 3 દિવસ પહેલા જ વિદ્યાર્થીએ ફ્લેટના છઠ્ઠા માળેથી ઝંપલાવ્યું

મળતી વિગતો મુજબ, ન્યૂ રાણીપના એરિસ્ટો આનંદમ ફ્લેટના B બ્લોકમાં છઠ્ઠા માળે રહેતા 17 વર્ષીય કહાન પટેલે મોડી રાત્રે આશરે અઢી વાગ્યાની આસપાસ પોતાના બેડરૂમની બાલ્કનીમાંથી છલાંગ લગાવી દીધી હતી. 14 માળના ફ્લેટમાંથી કહાન નીચે પડતાં જ મોટો અવાજ થયો હતો, જેથી સિક્યુરિટી ગાર્ડ દોડી આવ્યો હતો અને તેણે અન્ય રહીશોને જાણ કરી હતી. નીચે પડ્યાં બાદ કહાનના શ્વાસ થોડીવાર ચાલતા હતા, પરંતુ એમ્બ્યુલન્સ ઘટના સ્થળે પહોંચે તે પહેલાં જ તેનું મોત નીપજ્યું હતું.

પોલીસના જણાવ્યાં અનુસાર, મૃતક કહાન પટેલ ભુયંગદેવની નેશનલ સ્કૂલમાં અભ્યાસ કરતો હતો. તેણે વર્ષ 2025માં ધોરણ-12ની પરીક્ષા 85 ટકા સાથે પાસ કરી હતી. આ વર્ષે આપેલી NEETની પરીક્ષામાં પણ તેનું પરિણામ સારું આવ્યું હતું, છતાં તે વધુ સારા સ્કોર માટે ફરીથી મહેનત કરી રહ્યો હતો. તેણે બેકઅપ પ્લાન તરીકે ફાર્મસીનું ફોર્મ પણ ભર્યું હતું. કહાન સોશિયલ મીડિયાથી દૂર રહી શકે તે માટે તેના કોચિંગ ક્લાસમાં જ મોબાઈલ રાખવામાં આવતો હતો. પોલીસે હાલ તેનું લેપટોપ કબ્જે કરીને તપાસ શરૂ કરી છે.

પોલીસ તપાસમાં સામે આવ્યું છે કે કહાનના માતા-પિતા છેલ્લા ત્રણ વર્ષથી અલગ રહે છે. કહાન તેના 13 વર્ષના નાના ભાઈ અને માતા સાથે આ ફ્લેટમાં રહેતો હતો, જ્યારે તેના પિતા સુરતમાં ક્રિમિનલ વકીલ તરીકે પ્રેક્ટિસ કરે છે.