કિંજલ રબારીના પ્રેમ લગ્નનો મુદ્દો ફરી ગરમાયો, કોર્ટ બહાર અશોક ચૌધરી પર જીવલેણ હુમલાનો પ્રયાસ

મળતી માહિતી મુજબ, 15 જૂનના રોજ રાધનપુર ફેમિલી કોર્ટમાં છૂટાછેડાના કેસની મુદ્દત હતી. અશોક ચૌધરી કોર્ટની કાર્યવાહી અને મુદ્દત પૂર્ણ કરીને પોતાની ગાડીમાં પરત ફરી રહ્યાં હતા, ત્યારે અચાનક ચાર અજાણ્યા શખ્સોએ તેમની ગાડીને ઘેરી લીધી હતી. આ હુમલાખોરોના હાથમાં તીક્ષ્ણ હથિયારો હતા અને તેમણે અશોક ચૌધરી પર હિંસક હુમલો કરવાનો પ્રયાસ કર્યો હતો. જો કે, અશોક ચૌધરી આ હુમલામાંથી આબાદ બચી ગયા હતા.

સૂત્રોના જણાવ્યાં અનુસાર, કિંજલ રબારીના પરિવારજનો દ્વારા અશોક ચૌધરી પર કિંજલ સાથે કાયદાકીય રીતે છૂટાછેડા લેવા અને ડિવોર્સના કાગળો પર સહી કરવા માટે અવારનવાર ભારે દબાણ કરવામાં આવતું હતું. પરંતુ અશોક ચૌધરીએ છૂટાછેડાના કાગળ પર સહી કરવાની સ્પષ્ટ મનાઈ કરી દીધી હતી. આ કારણે જ મામલો વધુ ગરમાયો છે.

કોર્ટ પરિષરની બહાર જીવલેણ હુમલાના પ્રયાસ બાદ અશોક ચૌધરી તાત્કાલિક પોલીસ સ્ટેશન પહોંચ્યા હતા. તેમણે આ મામલે સમી પોલીસ સ્ટેશનમાં 4 શખ્સો વિરુદ્ધ ફરિયાદ નોંધાવી હતી. પોલીસે ફરિયાદને આધારે આગળની કાયદેસરની તપાસ હાથ ધરી હતી.