તાપીની આશ્રમ શાળામાં એક વિદ્યાર્થીનીએ બીજી વિદ્યાર્થીની પર ચપ્પુથી જીવલેણ હુમલો કર્યો, 20 ટાંકા આવ્યાં

આરોપી છોકરીએ પીઠ પાછળ કે શર્ટમાં કંઈક ભરાઈ ગયું હોવાનું બહાનું કાઢીને ભોગ બનનાર વિદ્યાર્થીનીને શાળાના ત્રીજા માળે આવેલા બાથરૂમમાં બોલાવી હતી. ત્યાં લઈ જઈને આરોપી છોકરીએ અચાનક જ તેનું ગળું પકડી લીધું હતું અને તેને જમીન પર પછાડી દીધી હતી. ત્યાર બાદ પોતાની પાસે સંતાડી રાખેલું તીક્ષ્ણ ચપ્પુ બહાર કાઢીને માસૂમ બાળકીના હાથ પર જોરદાર ઘા ઝીંકી દીધા હતા.

ચપ્પુનો ઘા એટલો ઊંડો અને જોરદાર હતો કે તે હાડકા સુધી પહોંચી ગયો હતો. હુમલાને કારણે હાથની નસ કપાઈ ગઈ હતી અને અતિશય લોહી વહી ગયું હતું.

બાળકીને તાત્કાલિક વ્યારાની સરકારી હોસ્પિટલમાં પ્રાથમિક સારવાર આપી વધુ ગંભીર સ્થિતિને કારણે સુરતની યુનિક હોસ્પિટલમાં ખસેડવામાં આવી હતી. કલાકોની મહેનત બાદ કપાઈ ગયેલી નસો અને લોહી બંધ કરવા માટે 20 જેટલા ટાંકા લેવા પડ્યા હતા. ડૉક્ટરોના જણાવ્યાં અનુસાર હાલમાં હાથમાં લોહીનું પરિભ્રમણ સારું છે, પરંતુ સંપૂર્ણ રુઝ આવવામાં હજુ સમય લાગશે. હાલમાં પોલીસે આ મામલે વધુ તપાસ શરૂ કરી છે.