વિસનગરની કાંસા ચોકડીએ બે ભૂદેવને દૂધના ટેન્કરે કચડ્યા, છોગાળા ગામે હવન કરાવવા જતા હતા

આ અકસ્માતમાં વિસનગરના શ્રી હરિ ડુપ્લેક્ષમાં રહેતા અશોકભાઈ નટવરલાલ ત્રિવેદી અને ગાયત્રી રોયલ્સ બંગલોઝમાં રહેતા નવીનભાઈ વ્યાસનું મોત થયું છે. કાંસા ચોકડી પાસેથી પસાર થતી વખતે પૂરપાટ ઝડપે આવેલા દૂધના ટેન્કરે એક્ટિવાને અડફેટે લીધું હતું. ટક્કર એટલી જોરદાર હતી કે ટેન્કર એક્ટિવા અને બંને સવારોને થોડે દૂર સુધી ઢસડી ગયું હતું. લોકો બૂમો પાડતા રહ્યાં છતાં ટેન્કરચાલકે વાહન હંકારવાનું ચાલુ જ રાખ્યું હતુ.  

અકસ્માત સર્જીને નાસી છૂટવાનો પ્રયાસ કરી રહેલા ટેન્કર ચાલકને આસપાસના લોકોએ પીછો કરીને ઝડપી લીધો હતો અને વિસનગર પોલીસને સોંપી દીધો હતો. પોલીસે ડ્રાઇવરની અટકાયત કરીને આગળની કાયદેસરની કાર્યવાહી હાથ ધરી હતી. બંને મૃતદેહોને પોસ્ટમોર્ટમ માટે વિસનગર સિવિલ હોસ્પિટલ ખસેડાયા હતા. ધાર્મિક કાર્ય માટે નીકળેલા બંને વ્યક્તિઓના મોતથી પરિવારોમાં ભારે શોકનું મોજું ફરી વળ્યું છે.

આ ઘટના બાદ કાંસા ચોકડી વિસ્તારની બિસ્માર રોડની સમસ્યા ફરી સામે આવી હતી. સ્થાનિકોના જણાવ્યાં મુજબ, રોડ ખખડધજ થઈ ગયો છે અને રસ્તા પર સતત કપચી અને ધૂળની ડમરીઓ ઊડતી હોવાથી અહીં અવારનવાર નાના- મોટા અકસ્માતો સર્જાય છે. તંત્રની બેદરકારી સામે સ્થાનિકોએ રોષ વ્યક્ત કર્યો હતો.