ભાવનગરમાં રામ દરબારમાંથી પરત ફરતા કાકા- ભત્રીજાને કારે કચડ્યાં, બંનેના મોત

મળતી માહિતી મુજબ, ઘોઘારોડ કૈલાશ સોસાયટીમાં રહેતા બેચરભાઈ ખાટાભાઈ બારૈયા (ઉ.વ. 48) અને બળવંતરાય સોસાયટીમાં રહેતા તેમના ભત્રીજા રાકેશભાઈ મનસુખભાઇ બારૈયા (ઉ.વ. 528) કાળીયાબીડ ખાતે આયોજિત રામ દરબારના કાર્યક્રમમાં ગયા હતા. મોડી રાત્રે બંને પોતાનું મોટરસાયકલ  લઈને ઘરે પરત ફરી રહ્યા હતા, ત્યારે રિંગ રોડ પર શ્રીજી પાર્ટી પ્લોટ સામે પાછળથી આવતી સ્વીફ્ટ કારના ચાલકે તેમને અડફેટે લીધા હતા.

અકસ્માત એટલો ભયાનક હતો કે બાઈક સવારોને ફંગોળ્યા બાદ કાર ચાલકે સ્ટિયરિંગ પરથી કાબૂ ગુમાવી દીધો હતો. પરિણામે, કાર  રોડની સાઈડમાં ઉભેલા આર.એમ.સી.ના બંધ ટેન્કર પાછળ ધડાકાભેર ઘૂસી ગઈ હતી. અકસ્માતનો પ્રચંડ અવાજ સાંભળી આસપાસના સ્થાનિક લોકો તાત્કાલિક ઘટનાસ્થળે દોડી આવ્યા હતા અને લોકટોળા એકત્ર થઈ ગયા હતા.

સ્થાનિક લોકોએ તાત્કાલિક 108ને જાણ કરતા ઈજાગ્રસ્ત કાકા-ભત્રીજાને લોહીલુહાણ હાલતમાં સર ટી. હોસ્પિટલ ખસેડાયા હતા. જ્યાં ફરજ પરના તબીબોએ તપાસ બાદ બંનેને મૃત જાહેર કર્યા હતા. પોલીસ દ્વારા બંને મૃતદેહોને પોસ્ટમોર્ટમ અર્થે મોકલી આપવામાં આવ્યા હતા. બીજી તરફ, કારમાં સવાર બે ઈજાગ્રસ્ત વ્યક્તિઓને વધુ સારવાર માટે ખાનગી હોસ્પિટલમાં દાખલ કરવામાં આવ્યાં હતા.