ભાવનગરના જન્માષ્ટમીના મેળામાં ગાંધીનગર S.I.T.નો નકલી PSI ઝડપાયો

જવાહર મેદાનમાં કાયદો અને વ્યવસ્થાની જાળવણી માટે ઘોઘારોડ પોલીસ સ્ટેશનનો સ્ટાફ પેટ્રોલિંંગમાં હતો. તે દરમિયાન પોલીસને ચોક્કસ બાતમી મળી હતી કે, એક શખ્સ પોતાની પાસે પોલીસનું બનાવટી આઈ- કાર્ડ રાખીને મેળામાં ફરી રહ્યો છે અને પોલીસના નામે જુદી જુદી રાઈડ્સમાં બેસીને મફતમાં મજા માણી રહ્યો છે. આ બાતમીને આધારે પોલીસે તાત્કાલિક વોચ ગોઠવી શંકાસ્પદ શખ્સને કોર્ડન કરી ઝડપી પાડ્યો હતો.

પોલીસે પકડાયેલા શખ્સની અંગઝડતી લેતાં તેની પાસેથી ગુજરાત પોલીસ લખેલું ગાંધીનગર S.I.T.ના પોલીસ સબ ઇન્સ્પેક્ટર તરીકેનું એક ઓળખકાર્ડ મળી આવ્યું હતું. આ કાર્ડ પર મોબીન ઇકબાલભાઈ સોડાગર નામ દર્શાવેલું હતું. પૂછપરછ દરમિયાન આરોપીની ઓળખ જગદીશ ડાહ્યાભાઈ મકવાણા (રહે. ભુંભલી રામપર ગામ, જિ. ભાવનગર) તરીકે થઈ હતી. વ્યવસાયે રત્નકલાકાર એવા જગદીશે સરકારી સેવકના ખોટા હોદ્દા અને અન્ય વ્યક્તિના નામનો દુરુપયોગ કરી બોગસ કાર્ડ બનાવ્યું હોવાની પોલ ખૂલી ગઈ હતી.

ઘોઘારોડ પોલીસે બનાવટી આઈ-કાર્ડ કબ્જે કરી આરોપી જગદીશ મકવાણા સામે BNS એક્ટની કલમ 204 મુજબ ગુનો નોંધી તેની અટકાયત કરી છે. આ નકલી કાર્ડ તેણે ક્યાંથી અને કોની મદદથી પ્રિન્ટ કરાવ્યું હતું તેમજ ભૂતકાળમાં આ બનાવટી ઓળખકાર્ડનો ઉપયોગ કરીને કોઈ ગેરકાયદે પ્રવૃત્તિ કે છેતરપિંડી આચરી છે કે નહીં, તે દિશામાં પોલીસે ઊંડાણપૂર્વક તપાસ હાથ ધરી છે.