ભાવનગરમાં લિવ ઈન પાર્ટનરની હત્યા કરનાર આરોપીનું રિકન્સ્ટ્રક્શન, PI એ જાહેરમાં 107 દંડા ફટકાર્યા

હત્યાના ગુનામાં ઝડપાયેલા ફૈઝલને પોલીસ ઘટના સ્થળે તપાસ અને રિકન્સ્ટ્રક્શન અર્થે લઈ ગઈ હતી. જ્યાં નીલમબાગ પીઆઈ ડી.પી. ઉનડકટે આરોપીને દોરડાથી બાંધી જાહેરમાં 107 ડંડા ફટકાર્યા હતા. વિવાદ વકરતાં પી આઈએ સ્પષ્ટતા કરી કે, આવું કોઈ બીજી મહિલાઓ સાથે ફરી ન બને તે માટે આરોપીની જાહેરમાં સર્વિસ કરવામાં આવી હતી.

સુપ્રીમ કોર્ટ અને ગુજરાતના પૂર્વ ઇન્ચાર્જ ડીજીપી ડૉ. કે.એલ.એન. રાવ દ્વારા સ્પષ્ટ આદેશ આપવામાં આવ્યાં હતા કે કોઈ પણ આરોપીનું જાહેરમાં સરઘસ કાઢવું નહીં કે તેમની સાથે અપમાનજનક કે અમાનવીય વર્તન કરવું નહીં, નહીં તો પોલીસ સામે કાયદેસર પગલાં લેવાશે.તેમ છતાં પીઆઈ દ્વારા જાહેરમાં ઢોર માર મારવામાં આવતા પોલીસ તંત્રની કાર્યવાહી સામે ગંભીર સવાલો ઊભા થયા છે.

ભાવનગરના કુંભારવાડામાં રહેતા 70 વર્ષીય ભાગુબેન બારૈયાની 40 વર્ષીય દીકરી કાજલબેન છેલ્લા 8 વર્ષથી એસ.ટી. બસ સ્ટેન્ડની ફૂટપાથ પર રહેતા 20 વર્ષીય ફૈઝલ ઉર્ફે ખાટકી રફિકભાઈ લાખાણી સાથે લિવ-ઈન રિલેશનશિપમાં રહેતી હતી. 3 સપ્ટેમ્બરના રોજ કાજલબેન પોતાના પરિચિત રવિ ઉર્ફે બાડો ગોહેલ સાથે બસ સ્ટેન્ડ પાસે ઊભા રહીને વાત કરી રહ્યાં હતા. તે સમયે જેલમાંથી છૂટીને આવેલા ફૈઝલે ત્યાં પહોંચી આડા સંબંધ હોવાની આશંકા રાખીને ઝઘડો શરૂ કર્યો હતો.

ઉશ્કેરાયેલા ફૈઝલે કાજલબેન અને રવિ પર હુમલો કરી કાજલબેનને વાળ પકડીને માથા તથા મોઢાના ભાગે ટાઈલ્સ પર પટકી ગંભીર ઈજાઓ પહોંચાડી હતી. ગંભીર રીતે ઘવાયેલા કાજલબેનને સર ટી. હોસ્પિટલ ખસેડાયા હતા પરંતુ તેેમનું મોત થઇ ગયું હતુ.