ચોટીલાના PI- PSI સહિત 4 પોલીસકર્મીઓ સસ્પેન્ડ, સુરેન્દ્રનગર LCBમાં પણ મોટા પાયે બદલીઓ થઇ

SMC ની ટીમને નાની મોલડી ગામ નજીક આવેલી પવનપુત્ર રાજસ્થાની હોટલના કમ્પાઉન્ડમાં ગેરકાયદેસર કેમિકલની પ્રવૃત્તિઓ ચાલી રહી હોવાની ચોક્કસ બાતમી મળી હતી. જેના આધારે દરોડો પાડીને પોલીસે 8330 કિલોગ્રામ કેમિકલ સહિતનો મુદ્દામાલ કબજે લીધો હતો.

પોલીસે સ્થળ પરથી ચુનીલાલ તુલસીરામ ગામેતી અને આશિષકુમાર યાદવની અટકાયત કરી હતી. પ્રાથમિક તપાસમાં આ નેટવર્ક ભુપતભાઈ પટગીર, હિતેશભાઈ બચુભાઈ સોલંકી અને ભગીરથ ખીચડ દ્વારા સંચાલિત થતું હોવાનું બહાર આવ્યું હતું.

જેને લઈ ચોટીલાના PI અને PSI સહિત 4 સસ્પેન્ડ કરાયા હતા. આ મામલે સ્થાનિક ચોટીલા પોલીસ મથકના અધિકારીઓ અને કર્મચારીઓની ગંભીર બેદરકારી સામે આવતા રેન્જ આઈજીના આદેશથી જયદીપ સોલંકી - PI, ચોટીલા, જી.એન. કુલચ્છર  - PSI ચોટીલા, નરેન્દ્રસિંહ - કોન્સ્ટેબલ, દિલીપભાઈ માંજરીયા કોન્સ્ટેબલને સસ્પેન્ડ કરાયા હતા.

SMCની રેડના પડઘા લોકલ ક્રાઈમ બ્રાન્ચ સુધી પડ્યા છે, જેમાં પણ મોટા પાયે બદલીઓ કરવામાં આવી હતી.  LCBના PI જે.જે. જાડેજાની બદલી કરીને તેમના સ્થાને ભાવેશકુમાર સિંગરેખિયાને જવાબદારી સોંપાઈ હતી. LCBના PSI જાવેદખાન પઠાણની સાયબર ક્રાઈમ પોલીસ સ્ટેશનમાં બદલી કરાઈ હતી. આ ઉપરાંત હેડ કોન્સ્ટેબલ અસ્લમ મલેક, પ્રવીણ કોલા, યશપાલસિંહ અને અજયસિંહ સહિતના LCB કર્મચારીઓને પણ અલગ-અલગ પોલીસ મથકોમાં વિખેરી નાખવામાં આવ્યા હતા.