સુલ્તાનના પ્રેમમાં આંધળી બનેલી સોનમનો મૃતદેહ લોહીથી લથબથ મળ્યો, પરિવારની મરજી વિરુદ્ધ કર્યા હતા લગ્ન

સુલ્તાનના પ્રેમમાં સોનમ આંધળી બની ગઈ હતી

આ કરુણ ગાથાની શરૂઆત 2011 માં થઈ હતી, જ્યારે ગાંધીધામના ભારતનગરના રહેવાસી સુલ્તાન સુમરાના પ્રેમમાં આંધળી બનેલી સોનમે પોતાના પરિવાર સાથેના સંબંધો તોડી નાખ્યા હતા અને તેની સાથે ભાગી જઈને લગ્ન કરી લીધા હતા. દીકરીના આ નિર્ણયથી વ્યથિત થઈને તેના પિતા રતનબહાદુર સુનાર અને તેના બે ભાઈઓએ ગાંધીધામ છોડી દીધું. તેઓ પહેલા સિદ્ધપુર ગયા અને અંતે કાયમ માટે પોતાના વતન નેપાળ પાછા ફર્યા હતા.

લગ્નજીવનના શરૂઆતના વર્ષો તો સારી રીતે પસાર થયા,ત્યાર બાદ સુલ્તાનનું અસલી રૂપ બહાર આવવા લાગ્યું. તે નાની-નાની બાબતો પર સોનમ સાથે નિર્દયતાથી મારપીટ કરતો અને તેણે સોનમ પર એટલા કડક પ્રતિબંધો લાદી દીધા હતા કે તેને પોતાના પરિવાર સાથે વાત કરવાની પણ મંજૂરી ન હતી. સોનમ માત્ર દુબઈમાં રહેતા તેના નાના ભાઈ રાહુલ સાથે જ ગુપ્ત રીતે વાત કરી શકતી હતી.

મારા પતિનો સ્વભાવ ખૂબ જ ઉગ્ર છે, તેઓ મને રોજ મારે છે

12 જુલાઈના રોજ, ભયના ઓથાર હેઠળ જીવી રહેલી સોનમે તેના પિતરાઈ ભાઈ સંતોષ સુનારને ફોન કર્યો હતો, રડતાં-રડતાં તેણે તેના ભાઈને કહ્યું કે તેના પતિનો સ્વભાવ હિંસક છે અને તેઓ તેને રોજ મારે છે. ભયથી ધ્રૂજતી સોનમે તેના ભાઈને ચેતવણી આપી હતી કે તે ક્યારેય તેના ઘરે ન આવે કે તેને ફોન ન કરે, કારણ કે તેમ કરવાથી તે તેની હત્યા કરી નાખશે. તેનો ડર સાચો સાબિત થયો, શુક્રવારે પોલીસને માહિતી મળી કે ભરતનગરમાં એક પરિણીત મહિલાનું શંકાસ્પદ સંજોગોમાં મોત થયું છે અને તેના સાસરિયાં ઉતાવળમાં તેના અંતિમ સંસ્કારની તૈયારીઓ કરી રહ્યાં છે.

શરીર પર અસંખ્ય ઈજાઓ

ગાંધીધામ એ ડિવિઝન પોલીસ તાત્કાલિક ઘટના સ્થળે પહોંચી હતી, આરોપી સુલ્તાને પોલીસને ગેરમાર્ગે દોરવા માટે એવી વાર્તા બનાવી કે સોનમને મૃગીના હુમલા આવતા હતા અને પડી જવાથી તેનું મોત થયું છે. જ્યારે પોલીસે મૃતદેહની તપાસ કરી ત્યારે સુલ્તાનનું ષડયંત્ર પકડાઇ ગયુ, સોનમના શરીર પર અસંખ્ય ઈજાઓ હતી.

હકીકતો જાણવા માટે, મૃતદેહને સૌ પ્રથમ રામબાગ સરકારી હોસ્પિટલ અને ત્યારબાદ ફોરેન્સિક પોસ્ટમોર્ટમ માટે જામનગર મેડિકલ કોલેજ મોકલવામાં આવ્યો હતો, જ્યાં તબીબોએ પુષ્ટિ કરી હતી કે આ મોત ઘાતકી હુમલાને કારણે થયું હતું. પોલીસના જણાવ્યાં અનુસાર, આરોપી સુલ્તાનની અટકાયત કરવામાં આવી છે અને તેની પૂછપરછ ચાલી રહી છે. 

બહેનના મોત બાદ ભાઈ દુબઈથી પરત ફર્યો

બહેનના મોતના સમાચાર મળતાં જ રાહુલ સુનાર દુબઈથી ગાંધીધામ દોડી આવ્યો અને આરોપી સુલ્તાન વિરુદ્ધ હત્યાનો કેસ દાખલ કર્યો. શોકમાં ડૂબેલા રાહુલે કહ્યું, મારી એકમાત્ર ઈચ્છા એ છે કે મારી બહેનને ન્યાય મળે, એવો ન્યાય જેનાથી અન્ય કોઈ યુવતીએ આવી પીડા અને વેદના સહન ન કરવી પડે. તે તેના અંતિમ ક્ષણોમાં અમારો સંપર્ક કરી શકી ન હતી.