ખેડા જિલ્લાના માતરમાં નિવૃત્ત પોલીસ અધિકારીના ઘર પર હુમલો, ફાયરિંગના આક્ષેપો બાદ તપાસ શરુ

પોલીસ મથકે નોંધાયેલી ફરિયાદ અનુસાર, નજીવી બાબતે થયેલી તકરાર બાદ ઉશ્કેરાયેલા લોકોનું ટોળું નિવૃત્ત પોલીસ અધિકારીના નિવાસસ્થાને ધસી આવ્યું હતું અને ત્યાં જોરદાર હોબાળો મચાવ્યો હતો. હુમલાખોરોએ ઘરની બહાર પાર્ક કરવામાં આવેલાં વાહનોને નિશાન બનાવી તેમાં ભારે તોડફોડ કરી નુકસાન પહોંચાડ્યું હતું. ફરિયાદમાં સૌથી ગંભીર આરોપ એ મૂકવામાં આવ્યો છે કે, હુમલાખોરોએ નિવૃત્ત પોલીસ અધિકારીના ઘર તરફ બંદૂક જેવા હથિયારથી ફાયરિંગ પણ કર્યું હતું. આ સાથે જ હુમલાખોરોએ પરિવારના સભ્યોને જાનથી મારી નાખવાની ધમકીઓ આપી હતી.

ઘટનાની જાણ થતાં જ માતર પોલીસનો કાફલો તાત્કાલિક ઘટના સ્થળે દોડી ગયો હતો. પોલીસે સ્થિતિને કાબૂમાં લઈ આસપાસના વિસ્તારમાં અને સર્કિટ હાઉસ રોડ પર લાગેલા CCTV કેમેરાના ફૂટેજ કબ્જે લીધા છે. હુમલાખોરોની ઓળખ કરવા માટે ટેકનિકલ સર્વેલન્સની પણ મદદ લેવામાં આવી રહી છે.