કચ્છનો 575 કરોડ રૂપિયાનો ડ્રગ્સ કેસ: 18 પાકિસ્તાનીઓ સહિત 19 સ્મગલરોને 20 વર્ષની જેલની સજા

ગુજરાત ATS, ઇન્ડિયન કોસ્ટગાર્ડ અને SOG પોલીસની સંયુક્ત કાર્યવાહી અંતર્ગત અલગ-અલગ સમયે દરિયામાંથી કરોડો રૂપિયાનું ડ્રગ્સ ઝડપી પાડવામાં આવ્યું હતું. આ ત્રણેય કેસમાં જપ્ત કરાયેલા ડ્રગ્સની કુલ આંતરરાષ્ટ્રીય કિંમત 575 કરોડ રૂપિયા હતી.

પ્રથમ કેસ 6 જાન્યુઆરી, 2020ના રોજ નોંધાયો હતો. જખૌના દરિયામાંથી સુરક્ષા એજન્સીઓએ 157 કરોડ રૂપિયાનું હેરોઈન જપ્ત કર્યું હતું. બીજો કેસ 15 એપ્રિલ, 2021ના રોજ નોંધાયો હતો. જખૌ નજીકથી જ 150 કરોડના હેરોઈનના જથ્થા સાથે 8 પાકિસ્તાનીઓને ઝડપી પાડવામાં આવ્યાં હતા. ત્રીજા કેસમાં 8 ઓક્ટોબર 2022ના રોજ ગુજરાત ATS અને કોસ્ટગાર્ડની ટીમે મધદરિયે એક શંકાસ્પદ બોટને આંતરીને 250 કરોડ રૂપિયાનું હેરોઈન ઝડપી પાડ્યું હતું.

કોર્ટ દ્વારા આરોપીઓને આકરી સજા ફટકાર્યા બાદ દેશવિરોધી તત્વોમાં એક સ્પષ્ટ સંદેશો ગયો કે, ભારતીય સુરક્ષા સાથે ચેડાં કરનારા અને માદક પદાર્થોની તસ્કરી કરનારા ગુનેગારોને કોઈપણ સંજોગોમાં છોડવામાં આવશે નહીં.