ભાવનગરના મહુવામાં બે કલાકમાં 3.15 ઇંચ વરસાદ, 10 જુલાઈ સુધી રાજ્યમાં ભારે વરસાદની આગાહી

હવામાન વિભાગે 10 જુલાઈ સુધી રાજ્યમાં ભારેથી અતિભારે વરસાદની આશંકા વ્યક્ત કરી છે. હાલમાં રાજ્ય પર 5 શક્તિશાળી હવામાન સિસ્ટમો એકસાથે સક્રિય થઈ હોવાથી આગામી દિવસો ગુજરાત માટે ભારે સાબિત થઈ શકે છે. 7 જુલાઈ સુધી ગાજવીજ સાથે 40થી 50 કિમી પ્રતિ કલાકની ઝડપે પવન ફૂંકાવાની અને વીજળી પડવાની સંભાવના છે.

અમરેલી જિલ્લામાં મેઘરાજાએ ફરી જોરદાર એન્ટ્રી કરતાં રાજુલા, જાફરાબાદ અને પીપાવાવના સમગ્ર કોસ્ટલ બેલ્ટમાં અનરાધાર વરસાદ વરસ્યો છે. જાફરાબાદ શહેર અને તાલુકામાં અત્યંત ભારે વરસાદ નોંધાતા અનેક વિસ્તારોમાં પાણી ભરાઈ જવાની સ્થિતિ સર્જાઈ છે. જાફરાબાદના લાઈટ હાઉસ વિસ્તારમાં દરિયાએ ફરી તોફાની સ્વરૂપ ધારણ કર્યું છે. ભારે પવન અને ઊંચા મોજાંને કારણે દરિયાકાંઠે જોખમી સ્થિતિ સર્જાઈ છે, જેના પગલે સ્થાનિક તંત્ર દ્વારા દરિયાકાંઠાના વિસ્તારોમાં સાવચેતી રાખવા સૂચના આપવામાં આવી રહી છે.

સ્ટેટ ઈમરજન્સી ઓપરેશન સેન્ટર મુજબ, ગુજરાતમાં ચાલુ સિઝનનો સરેરાશ 13.27% વરસાદ વરસી ગયો છે. દક્ષિણ ગુજરાતમાં સૌથી વધુ 17.11 ટકા નોંધાયો છે. જ્યારે, સૌરાષ્ટ્રમાં 15.38 ટકા, પૂર્વ-મધ્ય ગુજરાતમાં 10.87 ટકા, ઉત્તર ગુજરાતમાં 7.79 ટકા તથા કચ્છ ઝોનમાં માત્ર 0.40 ટકા સરેરાશ વરસાદ નોંધાયો છે