અમરેલીના હાડીડા ગામમાં પિતાએ પુત્રીની હત્યા કરીને લાશ ફ્રિજમાં મૂકી, પોતે ગળાફાંસો ખાધો

મળતી વિગતો અનુસાર, હાડીડા ગામમાં રહેતા કિશોરભાઈ ધાણક છેલ્લા કેટલાક સમયથી ગંભીર આર્થિક સંકડામણનો સામનો કરી રહ્યાં હતા. આ આર્થિક તંગીથી કંટાળીને તેમણે પોતાના જ કાળજાના કટકા સમાન માસૂમ પુત્રીના મોં આડો હાથ રાખી શ્વાસ રુંધીને તેની હત્યા કરી નાખી હતી. આટલેથી ન અટકતાં, પુત્રીના મૃતદેહને ઘરના ફ્રિજમાં સંતાડી દીધો હતો. ત્યારબાદ કિશોરભાઈએ પોતે પણ ઘરમાં ગળાફાંસો ખાઈ મોતને વ્હાલુ કરી લીધું હતું.

ઘટનાની જાણ થતાં જ આસપાસના લોકો ભેગા થઈ ગયા હતા. માસૂમ બાળકી અને પિતા બંનેના મોતથી પરિવાર સહિત સમગ્ર ગામમાં ઘેરા શોકની લાગણી પ્રસરી ગઈ છે. આ કમકમાટીભર્યા બનાવ સંદર્ભે મૃતક બાળકીની માતાએ પોલીસ મથકે પોતાના મૃતક પતિ વિરુદ્ધ પુત્રીની હત્યા અંગેની વિધિવત ફરિયાદ નોંધાવી છે. પોલીસે ઘટના સ્થળે પહોંચીને બંને મૃતદેહોને પોસ્ટમોર્ટમ અર્થે ખસેડી આગળની કાયદેસરની તપાસ હાથ ધરી છે.