નોળિયાના કરડવાથી મહિલાને થયો હડકવા, સ્થિતિ એટલી બગડી ગઈ કે તે પાણી જોઇને પણ ડરી જાય છે

રાજસ્થાનના સિરોહી જિલ્લાના રહેવાસી ડાલીબેન ઉજાજી સરગડાને દોઢ મહિના પહેલા નોળિયો કરડ્યો હતો. જેના કારણે તેમને હાઇડ્રોફોબિયા જેવા ગંભીર લક્ષણો જોવા મળ્યાં હતા. જ્યારે મહિલાને પાલનપુર હોસ્પિટલમાં લાવવામાં આવી ત્યારે ડોક્ટરો હડકવાના લક્ષણો જોઈને આશ્ચર્યચકિત થઈ ગયા હતા.

અહેવાલો અનુસાર, નોળિયો કરડ્યાં પછી મહિલાને રાજસ્થાનની સ્થાનિક હોસ્પિટલમાં હડકવાની રસીનો પહેલો ડોઝ આપવામાં આવ્યો હતો. ત્યાર બાદ તે બીજો ડોઝ લેવા ગઈ, પરંતુ સ્થાનિક ડોક્ટરે તેમને કહ્યું કે નોળિયા કરડવા માટે રસીકરણ જરૂરી નથી અને તેમને રસી લીધી નહીં.

રસીકરણનો કોર્સ પૂર્ણ કરવામાં નિષ્ફળ ગયાના દોઢ મહિના પછી લક્ષણો દેખાયા

રસીના બાકીના ડોઝ ન મળવાને કારણે મહિલાને દોઢ મહિનામાં હડકવાના ગંભીર લક્ષણો દેખાયા. આ લક્ષણોમાંનું એક હાઇડ્રોફોબિયા હતું - પાણીનો ડર, પાણી નજીક આવતાની સાથે જ તે ગભરાઈ જતા. આનાથી ડોકટરો સ્તબ્ધ થઈ ગયા. હવે, તેના હડકવાના લક્ષણોનું મૂલ્યાંકન કર્યા પછી ડોકટરોએ તેમની સારવાર શરૂ કરી છે.

આ કેસમાં ડોક્ટરે શું કહ્યું ?

મેડિકલ કોલેજ અને જનરલ હોસ્પિટલના ડોક્ટરે જણાવ્યું કે રાજસ્થાનની એક 45 વર્ષીય મહિલાને નોળિયો કરડ્યો હતો અને તેને હડકવા થયો હતો. તેને રસી કરાવવા માટે સ્થાનિક સારવાર કેન્દ્રમાં ગઈ હતી, પરંતુ ત્યાંના ડોક્ટરોએ તેને કહ્યું કે તેને હડકવા નથી. મહિલાને રસીના બાકીના ડોઝ મળ્યાં ન હતા. પરિણામે, તેમનામાં હડકવાના લક્ષણો જોવા મળી રહ્યાં છે. પાણી જોઈને તે ગભરાઈ જાય છે. તેને પાણી પીવડાવવાનો પ્રયાસ કરીએ તો તે ડરી જાય છે. તે હાલમાં સારવાર હેઠળ છે.