ઇડર તાલુકા પંચાયતના કારકુન રૂ. 15,000 ની લાંચ લેતા ACB ના છટકામાં ઝડપાયા

ફરિયાદીના પત્નીના નામે ‘દીનદયાળ ઉપાધ્યાય આવાસ યોજના’ હેઠળ મકાન સહાય મંજૂર થઈ હતી. આ યોજના અંતર્ગત પ્રથમ હપ્તાના રૂ. 30,000 ફરિયાદીના બેંક ખાતામાં જમા થયા હતા. આ રકમ જમા થતાં જ ઈડર તાલુકા પંચાયત (ઔડા ગ્રામ પંચાયત) ના મનરેગા વિભાગમાં મસ્ટર કારકુન (મેટ) તરીકે ફરજ બજાવતા આરોપી રમેશચંદ્ર મણીલાલ પંડયાએ ફરિયાદીને ફોન કર્યો હતો. તેણે પ્રથમ હપ્તાની રકમમાંથી રૂ. 15,000 ની લાંચ પેટે માગણી કરી હતી અને મનરેગા યોજનામાં પણ કંઈક ઓછું કરી આપવાની વાતચીત કરી હતી.

ફરિયાદી  લાંચની રકમ આપવા માગતા ન હોવાથી, તેમણે એ.સી.બી.નો સંપર્ક કરીને ફરિયાદ નોંધાવી હતી. ફરિયાદને આધારે એ.સી.બી.ની ટીમ દ્વારા લાંચના છટકાનું આયોજન કરવામાં આવ્યું હતું. ઇડરના દેશોતર ચાર રસ્તા પાસે આવેલા ‘માં પાર્લર’ ખાતે આરોપી રમેશચંદ્ર પંડયાએ ફરિયાદી સાથે લાંચની રકમ અંગે હેતુલક્ષી વાતચીત કરીને રૂ. 15,000 ની લાંચ સ્વીકારી હતી. તે જ સમયે એ.સી.બી.ની ટીમે દરોડા પાડીને આરોપીને સ્થળ પર જ પકડી પાડ્યો હતો અને લાંચની રકમ રૂ. 15,000 રિકવર કરી લીધી હતી.

ટ્રેપીંગ અધિકારી: એ.ડી.સુથાર 
પોલીસ ઈન્સ્પેકટર, સાબરકાંઠા એ.સી.બી.પો.સ્ટે. 

સુપરવિઝન અધિકારી: એ.કે.પરમાર, મદદનીશ નિયામક,
ગાંધીનગર એ.સી.બી. એકમ
  
ઇન્ચાર્જ અધિકારી: હરેશ મેવાડા, નાયબ નિયામક, 
એ.સી.બી. અમદાવાદ