મુંબઈ: સતિષ કૌશિકના મૃત્યુના શોકથી બોલિવૂડ ઈન્ડસ્ટ્રીને હજુ કળ નથી વળી ત્યાં વધુ એક દુખદાયક સમાચાર સામે આવ્યાં છે. પ્રખ્યાત નિર્દેશક પ્રદીપ સરકારનું નિધન થયું છે. ડાયરેક્ટર હંસલ મહેતાએ તેમના મૃત્યુંની પુષ્ટિ કરી છે. 67 વર્ષની વયે તેમણે દુનિયાને અલવિદા કહી દીધું છે. મનોજ બાજપેયીએ પણ તેમના નિધન પર શોક વ્યક્ત કર્યો છે. પ્રદીપ સરકારે સૈફ અલી ખાન અને વિદ્યા બાલનની ફિલ્મ પરિણીતાથી પોતાના દિગ્દર્શક કરિયરની શરૂઆત કરી હતી.

પ્રદીપ સરકાર અને હંસલ મહેતા ઘણા સારા મિત્રો છે. ડિરેક્ટરના નિધનની પુષ્ટિ તેમના નજીકના મિત્ર હંસલ મહેતાએ કરી છે. તેણે લખ્યું- પ્રદીપ સરકાર દાદા, RIP. અહેવાલો અનુસાર પ્રદીપે આજે વહેલી સવારે 3.30 વાગ્યે અંતિમ શ્વાસ લીધા હતા. તેઓ ડાયાલિસિસ પર હતા અને તેમનું પોટેશિયમનું સ્તર ઘટી ગયું હતું. જે બાદ તેને હોસ્પિટલ લઈ જવામાં આવ્યા, પરંતુ ડિરેક્ટરનું મોત થઈ ગયું.

હંસલ મહેતાના ટ્વિટને રીટ્વિટ કરતા અભિનેતા મનોજ બાયપેયીએ લખ્યું, 'ઓહ આ ખૂબ જ આઘાતજનક છે...શાંતિ.... દાદા!!' પ્રદીપ સરકારે 'લગા ચુનરી મેં દાગ', 'લફંગે પરિંદે', 'મર્દાની' અને 'હેલિકોપ્ટર ઈલા' ફિલ્મોનું સફળતાપૂર્વક નિર્દેશન કર્યું હતું.

દિગ્દર્શકને તેમના કામ માટે અનેક પુરસ્કારોથી પણ સન્માનિત કરવામાં આવ્યાં હતા. પ્રદીપને ફિલ્મફેર એવોર્ડ અને ઝી સિને એવોર્ડથી પણ સન્માનિત કરવામાં આવ્યાં હતા.