મહેસાણામાં કરોડો રૂપિયાના આંતરરાષ્ટ્રીય સાયબર ફ્રોડ નેટવર્કનો પર્દાફાશ

પ્રાથમિક તપાસ મુજબ, આરોપીઓ સામાન્ય લોકોને નાણાંકીય લાભની લાલચ આપીને ફસાવતા હતા. ત્યાર બાદ બોગસ દસ્તાવેજોના આધારે તેમના નામે બેંક ખાતાઓ ખોલાવવામાં આવતાં અને ગેરકાયદે સીમકાર્ડ મેળવવામાં આવતાં હતાં. સાયબર છેતરપિંડી દ્વારા ઉઠાવવામાં આવેલી રકમ આ મ્યુલ બેંક ખાતાઓમાં જમા કરાવી તેને અન્યત્ર ટ્રાન્સફર કરી લેવામાં આવતી હતી. આ પદ્ધતિ હાલ તપાસ એજન્સીઓ માટે મોટો પડકાર બન્યો છે.

પોલીસ તપાસમાં બહાર આવેલી ચોંકાવનારી વિગતો મુજબ, આ આખું સાયબર નેટવર્ક દુબઈથી ઓપરેટ થતું હોવાની વિગતો મળી છે. આ ગેંગ વિરુદ્ધ દેશના જુદા-જુદા રાજ્યોમાં સાયબર ફ્રોડની કુલ 34 ફરિયાદો નોંધાઈ ચૂકી છે. હાલ બાવલુ પોલીસે આ કેસમાં બેંક ટ્રાન્ઝેક્શન્સ, કોલ ડિટેઇલ્સ, બોગસ દસ્તાવેજો અને મની ટ્રેલ સુધી પહોંચવા માટે કવાયત હાથ ધરી છે.