અમદાવાદઃ 12થી 15 નવેમ્બર દરમિયાન ઇન્ડિયન સોસાયટી ઑફ હેમેટોલોજી એન્ડ બ્લડ ટ્રાન્સફ્યુઝનની 67મી વાર્ષિક પરિષદ હિમેટોકોન 2026 યોજાશે. આ ચાર દિવસીય પરિષદમાં દેશભરમાંથી આશરે 4,000 પ્રતિનિધિઓ અને 200 આંતરરાષ્ટ્રીય નિષ્ણાતો ભાગ લેશે. પરિષદમાં અગ્રણી હેમેટોલોજિસ્ટ્સ, હેમેટો-ઓન્કોલોજિસ્ટ્સ, મેડિકલ ઓન્કોલોજિસ્ટ્સ, સંશોધકો તથા અન્ય આરોગ્ય નિષ્ણાતો ઉપરાંત અમેરિકા, બ્રિટન, જર્મની, ઑસ્ટ્રેલિયા, જાપાન, ચીન અને બાંગ્લાદેશ સહિતના દેશોના નિષ્ણાતો ઉપસ્થિત રહેશે.
હેમેટોલોજી અને હેમેટો-ઓન્કોલોજીના ક્ષેત્રમાં દેશની મહત્ત્વપૂર્ણ શૈક્ષણિક પરિષદોમાંની એક તરીકે આ આયોજન વિશેષ મહત્ત્વ ધરાવે છે. ‘એડવાન્સિંગ હેમેટોલોજી: ફ્રોમ એવિડન્સ ટુ ક્લિનિકલ એક્સેલન્સ’ થીમ હેઠળ યોજાનારી હિમેટોકોન 2026માં નિષ્ણાતોને જ્ઞાનની આપ-લે, નવાં સંશોધનો પર ચર્ચા અને રક્તસંબંધિત રોગોના નિદાન તથા સારવાર ક્ષેત્રે થયેલી પ્રગતિ અંગે વિચારવિમર્શ માટે એક મંચ પૂરું પાડવામાં આવશે. પરિષદના શૈક્ષણિક કાર્યક્રમમાં સૌમ્ય અને ગંભીર પ્રકારના રક્તરોગો, ટ્રાન્સફ્યુઝન મેડિસિન, સ્ટેમ સેલ ટ્રાન્સપ્લાન્ટેશન, મોલેક્યુલર ડાયગ્નોસ્ટિક્સ અને લેબોરેટરી હેમેટોલોજી સહિતના વિવિધ વિષયો આવરી લેવામાં આવશે.
ઉપરાંત રાષ્ટ્રીય અને આંતરરાષ્ટ્રીય નિષ્ણાતોનાં વ્યાખ્યાનો તેમજ સંશોધન પત્રોની રજૂઆત પણ કરવામાં આવશે. ઇન્ડિયન સોસાયટી ઑફ હેમેટોલોજી એન્ડ બ્લડ ટ્રાન્સફ્યુઝન (ISHBT)ના સેક્રેટરી ડૉ. તુફાન કાંતિ ડોલાઈએ જણાવ્યું હતું કે, “હેમેટોલોજીના ક્ષેત્રમાં થયેલી પ્રગતિએ રક્તસંબંધિત અનેક રોગોના નિદાન અને સારવારની પદ્ધતિઓમાં પરિવર્તન લાવ્યું છે. હિમેટોકોન 2026 ભારત અને વિદેશના નિષ્ણાતોને એક મંચ પર લાવી જ્ઞાનની આપ-લે અને નવીનતમ વિકાસ અંગે ચર્ચા કરવાની તક પૂરી પાડશે. આ સાથે વહેલું નિદાન, રોગપ્રતિકારક પગલાં અને સારવારની સુલભતા અંગે જનજાગૃતિ વધારવી પણ એટલી જ મહત્ત્વપૂર્ણ છે.” પરિષદમાં છ મુખ્ય પ્રકારના રોગો અને આરોગ્ય સમસ્યાઓ પર વિશેષ ધ્યાન કેન્દ્રિત કરવામાં આવશે.
જેમાં સિકલ સેલ રોગ, હિમોફિલિયા, થેલેસેમિયા, એનિમિયા, લ્યુકેમિયા અને ઇમ્યુન થ્રોમ્બોસાઇટોપેનિયા (ITP) નો સમાવેશ થાય છે. સિકલ સેલ રોગ અંગેની ચર્ચામાં વહેલી તપાસ, આનુવંશિક પરામર્શ અને સર્વાંગી સારવાર પર ભાર મૂકવામાં આવશે. જ્યારે હિમોફિલિયા અને થેલેસેમિયા અંગેના સત્રોમાં વારસાગત રક્તરોગો પ્રત્યે જાગૃતિ, કેરિયર સ્ક્રીનિંગ અને યોગ્ય સારવારની સુલભતા જેવા મુદ્દાઓ આવરી લેવામાં આવશે. ઉપરાંત એનિમિયાના મૂળભૂત કારણોની ઓળખ અને સમયસર તબીબી સારવારના મહત્ત્વ પર પણ ભાર મૂકવામાં આવશે. લ્યુકેમિયાના નિદાન અને સારવારમાં થયેલી પ્રગતિ, જેમાં કીમોથેરાપી, ટાર્ગેટેડ થેરાપી, ઇમ્યુનોથેરાપી અને બોન મેરો ટ્રાન્સપ્લાન્ટેશનનો સમાવેશ થાય છે, તેની પણ ચર્ચા કરવામાં આવશે. જ્યારે ITPના સંદર્ભમાં પ્લેટલેટ્સની ઓછી સંખ્યા સાથે સંકળાયેલાં લક્ષણોની ઓળખ અને સારવારના વિકસતા વિકલ્પો અંગે માર્ગદર્શન આપવામાં આવશે.
